Туркия президенти Режеп Таййип Эрдоған рафиқаси билан мамлакатда ишлаб чиқарилган Togg Т10Х миллий электромобилининг биринчи эгаси бўлди, дея хабар бермоқда TRT Heber нашри.
Анқарадаги президент мажмуида ўтказилган тантанали маросимда Эрдоған Togg электромобили мамлакатнинг технологик ва иқтисодий тараққиёти ҳамда жаҳон миқёсидаги обрў-эътиборининг рамзи сифатида яратилганини таъкидлади. «Бугундан бошлаб биз Togg`ни йўлларда кўрамиз», — деди президент.
Кейинроқ у рафиқаси Эмине Эрдоған ҳамда саноат ва технология вазири Мустафо Варанк билан анадолу (қизил) рангли машинага миниб, мажмуани айланиб чиқди. Сўнгра журналистлар билан мулоқот ўтказди.
Мулоқот давомида Туркия раҳбари машина Озарбайжон президенти Илҳом Алиевга ҳам етказиб берилишини ва унинг ранги қизил эканини айтди. Шунингдек, автомобиль Ўзбекистон президенти Шавкат Мирзиёевга ҳам боришини, учрашув кутилаётганини қўшимча қилди.
Маълумот ўрнида, 160 киловаттли, бир қувватланишда 314 километр масофани босиб ўтоладиган Togg электрокарининг энг арзон модели 953 минг лира (50 минг доллардан ортиқ), кучлироқлари 1,215 миллион турк лираси (63 минг доллар)га баҳоланмоқда. Биринчи етказиб бериш июль ойига режалаштирилган. Ҳозиргача унга 177 мингта олдиндан буюртма олинган.
