Испаниянинг Maxam корпорацияси Ўзбекистон кимё саноатидаги қўшма корхона бўйича узоқ давом этган низо муносабати билан халқаро арбитраж муҳокамасини бошлади. Бу ҳақда Eurasianet нашри хабар бермоқда.
Maxam — тоғ-кон саноати ва қурилиш муҳандислиги учун портловчи моддалар ишлаб чиқарадиган компания шу йилнинг март ойида Лондонда судга мурожаат қилди. Ушбу келишмовчилик Maxam`нинг Ўзбекистондаги минерал ўғитлар ва кимёвий маҳсулотлар ишлаб чиқарадиган энг йирик корхоналардан бири бўлган Махам-Чирчиқдаги улушига тааллуқли. Ҳамкор «Ўзкимёсаноат» давлат компанияси ҳисобланади.
Maxam вакили Eurasianet билан суҳбатда «компаниянинг Ўзбекистон ҳукумати билан қийин муносабатлари» ҳақида таъкидлади. Тахминларга кўра, Испания компанияси шартнома бузилиши муносабати билан зарарни қоплаш учун судга мурожаат қилган.
«Maxam Ўзбекистон ҳукумати билан тинч йўл орқали келишувга катта умид боғлаганди, мамлакатга катта сармоя киритгани учун эмас, балки бу улар ўз муаммоларини мулоқот ва музокаралар орқали ҳал қила олмагани ҳисобига бўлди. Халқаро арбитраж судига даъво аризаси бериш уларнинг охирги чорасидир», — деди манба нашрга.
«Газета.uz» «Ўзкимёсаноат» матбуот котиби Рустамбек Эшбеков билан боғланганда, у «Ҳозирда бу борадаги аниқ ва асосли маълумотлар тайёрланмоқда. Яқин кунларда Тошкентда Maxam билан музокаралар кутилмоқда», дея таъкидлади.
Махам-Чирчиқ АЖ қўшма корхонаси 2002 йилда ташкил этилган Чирчиқ азот-тук заводи (По «Электрохимпром») негизида ташкил этилган. 2007 йилда MaxamCorp S.A.U. хусусийлаштириш жараёнининг бир қисми сифатида АЖ акцияларининг 49 фоизини сотиб олди.
2009 йилдан буён Maxam 2001 йилда корпоративлаштирилган «Аммофос-Максам» АЖ (собиқ Олмалиқ кимё заводи — Аммофос ПА)да ҳам катта улушга эгалик қилади.
Компаниянинг соф фойдаси 2021 йилда 253,6 млрд сўмни, 2020 йилда 140,5 млрд сўмни ташкил этди. Ўтган йил учун маълумотлар тақдим этилмаган. Таъкидлаш жоизки, корпоратив маълумотларнинг ягона порталида компания ҳақидаги сўнгги муҳим факт бир йилдан кўпроқ вақт олдин — 14 йил 2022 февралда эълон қилинган.
«КорпИнфо» Telegram канали хабарига кўра, «инвестициялар ва инвестиция фаолияти тўғрисида»ги қонуннинг 63-моддасига биноан, хорижий инвестициялар билан боғлиқ ва хорижий инвесторнинг Ўзбекистон ҳудудида ишлаши давомида юзага келадиган низо музокаралар йўли билан ҳал этилади. Агар инвестиция низоси тарафлари музокаралар йўли билан низони келишилган ҳолда ҳал қила олмасалар, бу муаммо воситачилик йўли билан ҳал қилиниши керак.
Музокаралар ва воситачилик йўли билан ҳал этилмаган низо Ўзбекистоннинг тегишли суди томонидан ҳал қилиниши керак.
Агар низоларни юқорида кўрсатилган усуллар билан ҳал этишнинг иложи бўлмаса, халқаро шартномада ва (ёки) инвестор билан республика ўртасида тузилган шартномада тегишли ва асосли арбитраж банди назарда тутилган бўлса, бундай низо халқаро арбитраж орқали ҳал қилиниши мумкин.
