Прогнозлаштириш ва макроиқтисодий тадқиқотлар институти (ПМТИ) экспертлари Тошкент шаҳрида март ойида хонадонлар учун ижара нархларининг ўзгаришини таҳлил қилди, натижалар нархлар пасайишда давом этаётганини кўрсатган.
Пойтахтда 2022 йилда хонадонлар учун ижара нархлари ўса бошлаган ва октябрь ойига келиб, ўзининг энг юқори нуқтасига чиққан, сўнгра пасая бошлаганди.
OLX.uz маълумотлар базасига кўра, ўшанда шаҳар бўйича ўртача таъмирланган хонадон учун ижара нархи 526 долларга чиққанди. 2023 йилнинг март ойида ижара учун ўртача нархлар февраль ойидагига нисбатан 2% га пасайган ва 411 долларни ташкил этган.
Ўртача таъмирланган 2 хонали уй учун ижара нархи 340 доллардан (Сергели) 460 долларгача (Яккасарой) ўзгарган ҳолда Тошкент шаҳри учун ўртача 411 долларни ташкил этган. 3 хонали уйлар учун эса нархлар 380 доллардан (Сергели) 600 долларгача (Миробод) ўзгарган ҳолда Тошкент шаҳри учун ўртача 480 долларни ташкил этган. Таъмирланган 1 хонали уй учун ўртача ижара нархи 320 долларни, 4 хонали уй учун 600 долларни, 5 хонали уй учун 660 долларни ташкил этган.
Ушбу таҳлил учун маълумотлар OLX.uz сайтидан веб-скрепинг (web-scraping) усули ёрдамида олинган. 2023 йил март ойи учун тўпланган 30,5 мингта кузатувлар ўрганилган.
