Давлат хавфсизлик хизматининг Наманган вилояти бўйича бошқармаси ходимлари бошқа ҳуқуқ-тартибот идоралари билан ҳамкорликда ўтказилган тезкор тадбирлар давомида олтин қуймаларнинг ноқонуний муомаласига чек қўйди, дея хабар бермоқда хизмат матбуот хизмати.
Дастлаб Андижон шаҳрида яшовчи 1984 йилда туғилган, муқаддам судланган шахс оғирлиги 672 грамм бўлган бир бўлак олтин қуймасини Наманган шаҳрида яшовчи 1981 йилда туғилган заргарга 40 минг долларга сотган вақтида уларнинг иккаласи ҳам ушланган.
Сўнгра ушбу заргар буюртмасига кўра, Олмалиқ шаҳридан оғирлиги 613 грамм бўлган бир бўлак олтин қуймасини олиб кетаётган Наманган шаҳрида яшовчи, 1986 йилда туғилган фуқаро бошқарувидаги Cobalt автомашинаси Чуст туманида тўхтатилиб, ашёвий далил процессуал тартибда расмийлаштириб олинган.
Бошқа бир ҳолатда эса Наманган шаҳрида яшовчи, 1991 йилда туғилган, муқаддам судланган шахс Поп тумани ҳудудида Ангрен шаҳрида истиқомат қилувчи, 1988 йилда туғилган фуқаро билан учрашиб, ундан оғирлиги 250 грамм бўлган 3 та олтин қуймасини сотиб олган вақтида уларнинг иккаласи ҳам ушланган.
Ўтказилган тезкор тадбирлар натижасида умумий баҳоси 1 миллиард 124 миллион сўмлик, жами 1 килорамм 535 грамм олтин қуймалари ҳамда 40 минг доллар ашёвий далил сифатида олинган.
