27 март куни Саудия Арабистонида Маккага зиёратчиларни олиб кетаётган автобус кўприкка урилиб, ёниб кетди. BBC хабарига кўра, оқибатда 20 киши ҳалок бўлган ва 30 нафарга яқин шахс жароҳатланган. Улар оғир даражада куйиш жароҳатини олган.

Al-Ekhbariya TV телеканали автоҳалокатдан сўнг автобуснинг куйган қолдиқлари акс этган кадрларни эфирга узатди. Унда айтилишича, ҳалокат Яман билан чегарадош жануби-ғарбий Асир вилоятида содир бўлган. Автомобиль тормози ишламай қолган. ЙТҲ қурбонлари ҳам яманликлар бўлган. Хабарларга кўра, йўловчилар кичикроқ ҳаж ёки умра зиёратига боришни режалаштирган.

«Газета.uz» Ўзбекистон ҳаж ва умра маркази жамоатчилик кенгаши билан боғланганда автоҳалокатда ўзбекистонлик зиёратчилар бўлмагани маълум қилинди.

Саудия Арабистонининг Al Arabiya телеканали хабарига кўра, улар орасида бир неча саудиялик ҳам бор.

2019 йилда 35 нафар араб ва осиёлик муҳожир умра учун Мадинадан Маккага кетаётган автобуснинг бошқа машина билан тўқнашиб кетиши оқибатида ҳалок бўлганди.