Ҳиндистон пойтахти Нью-Деҳли шаҳрида аёллар бокси бўйича жаҳон чемпионатидан Ўзбекистон терма жамоаси битта бронза медали билан қайтди. Бу ҳақда Ўзбекистон бокс федерацияси хабар берди.
Ушбу соврин бошқа давлат спортчисининг дисквалификация қилиниши эвазига насиб этди.
Ўзбекистонлик Навбаҳор Ҳамидова -66 кг вазн тоифасида иштирок этиб, чорак финалда жазоирлик Имане Хелифга имкониятни бой берди. Бироқ кейинчалик жазоирлик боксчи танлов қоидаларига риоя қилмагани сабабли дисквалификация қилинди.
Кўк рангли формадаги Имане Хелифнинг россиялик спортчини мағлуб этган ҳолати. Фото: IBA.
Reuters нашрининг ёзишича, унинг генетик текширувида тестостерон даражаси (эркаклик гормони) жуда юқори бўлгани аниқланган.
Хелиф финалда хитойлик Янг Лиуга қарши рингга кўтарилиши керак эди. Жазоир оммавий ахборот воситалари хабарига кўра, Хелиф ўзининг «фитна» қурбони бўлганини даъво қилган.
«Жазоирнинг олтин медални қўлга киритишини истамаган баъзи давлатлар бор. Бу фитна, биз бунга жим қараб турмаймиз», — дейди боксчи маҳаллий телеканалга берган интервьюсида.
23 ёшли спортчининг таъкидлашича, унга аёлларга қарши рингга чиқишига тўсқинлик қиладиган «хусусиятлари» борлигини айтишган.
«Мени ташқи кўринишим туфайли тез-тез ҳақорат қилишарди, бунга қаршилик кўрсатдим. Шуларга қарамай, курашни давом эттирдим. Шу вақтгача кўплаб турнирларда иштирок этдим ва ҳеч қандай муаммо йўқ эди. Лекин олтин медални қўлга киритиш имкониятим ошганида менга тўсқинлик қилишди, чунки бунинг эҳтимоли бошқаларникидан юқори эканини билишарди», — дея таъкидлади у.
Маълумот учун, Хелиф 2022 йилги жаҳон чемпионатининг финалида ирландиялик спортчига ютқазиб, кумуш медални қўлга киритганди. 2022 йилги Африка чемпионатида эса олтин медалга эга чиққан ва Ўрта денгиз ўйинларининг амалдаги чемпиони ҳисобланади.
Халқаро бокс ассоциацияси 2023 йилги турнирда ярим финалда Хелифдан мағлуб бўлган таиландлик Жанжаэм Суваннафенг бугунги олтин медаль учун баҳсда жазоирликнинг ўрнини эгаллашини маълум қилган. Финал баҳсида таиландлик спортчи кумуш, хитойлик Янг Лиу эса олтин медалига эга чиқди.
