Европа Тикланиш ва Тараққиёт Банки (ЕТТБ) Ўзбекистонда тадбиркор аёллар учун менторлик дастурининг иккинчи фазасини тез орада бошланиши ҳақида эълон қилади. Мазкур дастур учун ҳудудлар бўйича иштирокчиларни аниқлаш мақсадида, ЕТТБ Тошкент шаҳри ва Тошкент вилояти, шунингдек, Самарқанд шаҳри ва Фарғона водийси вилоятларидаги қизиқиш билдирган тадбиркор аёлларни белгиланган ариза шаклини тўлдиришларига таклиф қилади.
Дастурда ментор (устоз) ва менти (шогирд) сифатида иштирок этиш учун аризалар қабул қилинади. Иштирокчиларни саралаш босқичи дастурнинг барча параметрлари тасдиқланганидан сўнг танлов асосида амалга оширилади.
Дастурнинг ушбу фазаси доирасида 50 нафаргача ментилар танлаб олиниши режалаштирилмоқда. Танлов икки босқичда ўтказилади:
- Тўлдирилган анкета асосида (бунда компания бизнес фаолияти тўғрисида батафсил маълумот бериш керак. Олинган ушбу маълумотлар, иштирокчининг дастурда давомида муваффақиятини баҳолаш учун асос бўлиб хизмат қилади).
- Дастур ташкилотчилари билан суҳбат (онлайн/офлайн) асосида (суҳбат ўтказилиши формати ҳудудга қараб белгиланади).
Дастурда қатнашиш юзасидан иштирокчилар билан ёзма келишув имзоланиши назарда тутилган. Танловдан ўтган иштирокчилар дастур тадбирларининг камида 90 фоизида иштирок этишлари керак.
Менти учун номзодлар муайян талабларга мос келишлиги зарур, яъни компания давлат рўйхатдан ўтган ҳамда камида икки йиллик тажрибага эга бўлиши керак. Танлов жараёнида, ўз бизнесига эга бўлган малакали тадбиркор аёл номзодларга афзаллик берилади. Танловнинг биринчи босқичидан ўтган номзодлар бизнес фаолиятига оид тегишли ҳужжатларни (корхона/тадбиркорлик субъектининг давлат рўйхатидан ўтганлик гувоҳномаси, сертификат ва ҳ.к.) тақдим этишлари керак бўлади.
Ментилар қуйидаги ҳавола орқали рўйхатдан ўтишлари мумкин.
Рўйхатдан ўтишнинг охирги муддати: 2023 йил 31-март.
Менторлар, камида 5 йил давомида бизнес фаолият юритиб келаётган ҳамда энг ками
беш нафар ишчи-ходимдан иборат бўлган корхонага рахбарлик қилаётган, ўз соҳасининг малакали мутахассислари саналади. Менторлар ўз билим ва тажрибаларини улашишга тайёр бўлишлиги ҳамда ўзларига бириктириладиган ментилар билан ойига камида 1−2 марта учрашиш учун вақт ажратишлари керак бўлади.
Дастурнинг мазкур фазаси давомида, менторлар ўзига бириктирилган менти билан режа асосида энг ками саккизта ўзаро учрашувлар ўтказиши, шунингдек менти бизнесига оид масалалар ва муаммолар бўйича тегишли маслаҳатлар бериши лозим.
Дастурда ментор сифатида аёл ҳамда эркак тадбиркорлар иштирок этишлари мумкин бўлади, шу жумладан хорижий иштирокчилар ҳам ментор сифатида қабул қилинади.
Менторлар қуйидаги ҳавола орқали рўйхатдан ўтишлари мумкин.
Рўйхатдан ўтишнинг охирги муддати: 2023 йил 31-март.
Дастур давомида ментор ва менти жамоаларига зарур услубий ёрдам тақдим этилади, шунингдек, мазкур жамоалар ўз эришган ютуқлари ҳамда юзага келган қийинчиликларни қайд этиб борадилар.
Дастурнинг асосий мақсади — тадбиркор аёлларни ўз бизнесини янада ривожлантириш, уларни малакасини ошириш ва шахсий ўсишини қўллаб-қувватлаш, шунингдек, ўзаро фикр алмашинувига шароит яратишдир. Дастур давомийлиги камида олти ойни ташкил этиб, ҳар бир иштирокчи тадбиркорга янги кўникмалар ва бизнес соҳасидаги ўз салоҳиятини ўстириш имконини яратади. Дастур иштирокчилар учун ихтисослаштирилган тренингларда қатнашиш, ўзаро фикр алмашиш ҳамда ментор билан ишлаш жараёнларини ўз ичига олади. Менти иштирокчи лойиҳага ўзинг амалдаги бизнеси билан келади ва уни ривожланишнинг янги босқичга олиб чиқади. Иштирокчилар бизнес стратегияси, молиявий менежмент, рақамли маркетинг ва жамоа бўлиб ишлаш борасида ўқув машғулотлари орқали ўз салоҳиятини оширадилар.
2022 йил июль — 2023 йил февраль ойлари давомида SmartGov Consulting агентлиги билан ҳамкорликда амалга оширилган менторлик дастурининг биринчи фазаси бўлиб ўтди. Унда иштирокчилар учун 20 дан ортиқ тренинглар, семинарлар ва бошқа тадбирлар ташкил этилди. Мазкур фаза ижроси натижаси сифатида иштирокчиларининг 33% қисми ўз молиявий кўрсаткичларини яхшилаган, 47% қисми ўз бизнесининг мижозлари сонини ўсишига эришган, 47%`и бизнесининг ўзаро янги ҳамкорлик босқичларига кўтарилган ҳамда 14% қисми компанияларининг янги филиалларини очишга муваффақ бўлганлар.
Реклама ҳуқуқлари асосида.
