10 март, жума куни Бутунхитой халқ вакиллари кенгаши депутатлари бир овоздан Си Цзиньпинни учинчи 5 йиллик муддатга Хитой раиси лавозимига қайта сайлади. Бу ҳақда Синьхуа агентлиги хабар берди.
Давлат раҳбари сайлови жума куни эрталаб ялпи мажлисда яширин овоз бериш йўли билан бўлиб ўтди. Унда 2952 нафар депутат иштирок этди.
Си Цзиньпин учинчи муддатга сайланган биринчи Хитой раиси бўлди.
РИА Новости`нинг ёзишича, Си Цзиньпин, шунингдек, мамлакатнинг барча қуролли кучларига раҳбарлик ва ягона қўмондонликни таъминловчи Хитой Марказий ҳарбий комиссияси раҳбари лавозимига қайта сайланди.
Си Цзиньпин илк бор 2013 йил март ойида Хитой раиси этиб сайланган ва 2018 йил март ойида иккинчи беш йиллик муддатга қайта киришганди.
ХХР раислик лавозими 1954 йилда мамлакат конституциясининг қабул қилиниши билан ташкил этилган бўлиб, бу лавозимни биринчи бўлиб Мао Цзэдун эгаллаган. Бу лавозим 1975 йилда тугатилиб, 7 йилдан кейин қайта тикланган. Илгари конституция бир шахснинг ХХР раислигида 2 марта беш йиллик муддатга сайланишини чеклаган бўлса, 2018 йил мартида конституцияга киритилган ўзгартиришлардан сўнг тегишли чекловлар олиб ташланган.
Маълумот учун, Си Цзиньпин бу йил 70 ёшга тўлади ва у ҳокимиятда қанча вақт қолишни режалаштираётгани ҳақида аниқ тахминлар йўқ. Баъзи таҳлилчиларнинг фикрига кўра, ҳозирги раҳбар камида 2035 йилгача ўз позициясини сақлаб қолишга интилади.
Ўз навбатида, Ўзбекистон президенти Шавкат Мирзиёев Хитой Халқ Республикаси раиси Си Цзиньпинга Бутунхитой халқ вакиллари йиғинининг 14-чақириқ биринчи сессиясида олий лавозимга қайта сайлангани муносабати билан табрик йўллади.
