Внуково халқаро аэропортида Тошкентдан Москвага учган самолёт бортида жанжал келиб чиққани, айрим йўловчиларга тиббий ёрдам зарур бўлгани ҳақида Telegram`даги Baza каналида хабар берилганди. Uzbekistan Airways ахборот хизмати ҳолат юзасидан муносабат билдирди.
Тарқалган хабарларда самолёт қўнганидан кейин 210 нафар йўловчи 4 соат давомида аэропортда қолиб кетгани айтилган.
«Тошкентдан келаётган 601-рейс Домодедовога қўниши керак эди. Бироқ аэропорт бўйлаб 2 марта айланиб, Внуковога йўналтирилди. Об-ҳаво ёмонлиги расмий сабаб сифатида келтирилди. Аэропорт негадир одамларни ташиш учун автобус ажратишдан бош тортди. Бир неча соатдан кейин бортда жанжал бошланди. Маълумотларга кўра, аёллардан бирининг тоби ҳам қочган», — дейилади Baza хабарида.
Расмий муносабат
Uzbekistan Airways`нинг маълум қилишича, 7 март куни HY-601 Тошкент — Москва йўналишидаги авиақатнов ҳаво кемаси Домодедово аэропортининг об-ҳаво шароити (учиш-қўниш йўлагининг ҳолати хавфсиз қўнишни амалга ошириш учун зарур талабларга жавоб бермагани) сабабли Внуково халқаро аэропортига мажбурий қўнишни амалга оширган.
Ҳаво кемаси командири йўловчиларга йўналиш Внуково муқобил аэропортига ўзгаргани ҳақида маълумот берган. Об-ҳаво яхшилангани ва ҳаво кемаси Домодедово халқаро аэропортига учиб кетишга тайёр бўлганидан сўнг экипаж парвозга тайёрлигини эълон қилган.
Аммо ҳаво кемаси бортида аёл ўзини ёмон ҳис қила бошлаган, экипаж шифокорларни чақиришга мажбур бўлган, бу эса учиб кетиш вақтининг кечикишига таъсир қилган. Шу пайтда Домодедово халқаро аэропортидаги об-ҳаво яна кескин ёмонлашиб, бу иикинчи марта кечикишга олиб келган.
Кейинчалик ҳаво кемасидаги барча — 210 йўловчини Внуково халқаро аэропортига тушириш тўғрисида қарор қабул қилинган.
