Президент Администрацияси Ижро этувчи аппаратининг Коммуникациялар ва ахборот сиёсати бўйича шўъба мудири Саида Мирзиёева Халқаро хотин-қизлар куни муносабати билан аёлларни табриклади.
«Бугун, 8 март байрамида ён-атрофдан кўплаб чиройли сўзлар, ажойиб тилаклар эшитамиз. Лекин мен юрагимнинг тубидаги истагимни сиз билан баҳам кўрмоқчиман. Мен жамиятимизда аёлларга ҳар доим ҳурмат билан муносабатда бўлишларини хоҳлайман. Токи хотин-қизларимиз зўравонлик ва зулм, зарарли стереотиплар ва камситувчи муомала объекти бўлмасин», — деб ёзди у.
Саида Мирзиёева аёллар ўз ҳуқуқлари учун курашишларига зарурат бўлмаслигини хоҳлашини таъкидлаган.
«Улар табиий равишда жамиятнинг тенг ҳуқуқли аъзоси бўлсин, дейман. Мен аёллар ўзини эркин, кучли ҳис қиладиган, ўзига ишончи бўлган, мақсадларига эриша оладиган ва орзу қилишдан чўчимайдиган жамиятда яшашини истайман», — деди президентнинг қизи.
Аввалроқ, Саида Мирзиёева оиладаги зўравонликни жиноят деб баҳолашни таклиф қилган эди. «Оиладаги зўравонлик — оиланинг ички иши эмас, бу муаммо бутун жамиятга тегишли. Аёл ўз дарди билан ёлғиз қолиб кетмаслиги керак», — деганди у. Шунингдек, у вояга етмаганлар билан жинсий алоқа қилганлик учун жазо кучайиши зарурлигини айтган эди.
