Республика таълим маркази директори ўринбосари, блогер Исроил Тиллабоев ўзининг Telegram каналида унга мурожаат келиб тушганини билдирди, хабарда Андижон вилояти Марҳамат туманидаги «Келажак нури» кутубхонасининг электрдан қарздорлиги кўпайиб кетгани учун ёпилгани ҳақида сўз борган.
Шундан сўнг ҳолат жамоатчилик эътиборини тортиб, муҳокамаларга сабаб бўлди.
«Ўзи кутубхоналар маҳаллалардан йўқ қилиб юборилиб, болаларимизни китобга қизиқтира олмаётган, кутубхоналарни туман марказида битта-яримта эски, зах биноларда хужжатда борми-борга сақлаётган, кутубхоначиларга фаррош ойлигичалик ойликни бериб, ҳолинг нима демаётган бўлсагу, бир тадбиркор Америкадан кўриб келиб, туманимда ҳам Америкадагидек кутубхона бўлишга ҳақли, деб тушимизда кўрадиган кутубхонани шундоқ қуриб, уни шундайича давлатга тоиширсаю, электр тўловини эплаб тўлашга қурбимиз етмай, осон йўли ёпиб ташласак, бу диёрда бир марта эмас, йилда 10 марта машина соврини қўйиб, китобхонлик мусобақаси ўтказсак ҳам, овора бўлмайлик, ҳеч ҳам китобга меҳр туғилмайди ёшларда! Уят. Мен уялиб кетдим, сиз-чи, сиз уялмайсизми масъуллар?!» — деб ёзди Исроил Тиллабоев.
Ёшлар сиёсати ва спорт вазирининг 1-ўринбосари, Ёшлар ишлари агентлиги директори Алишер Саъдуллаев ҳам ҳолатга муносабат билдириб ўтди.
У Андижон вилояти ҳокимлиги техник муаммони тезкорлик билан ҳал қилишини, ҳал қилинмаса, агентлик туман балансига олиб, харажатларни қоплашга ҳам ёрдам бера олишини маълум қилди.
Туман ҳокими билан боғланганини билдирган журналист Умиджон Мамарасуловнинг аниқлик киритишича, кутубхона давлат балансида эмас, бинонинг бир қисмига давлат кутубхонаси тадбиркор ёрдами билан вақтинча жойлаштириб турилган. Ҳокимият агар алоқаси бўлганида, электр энергияси тўлови вақтида амалга оширилишини маълум қилган.
Туман ҳокимлиги муносабати
Таъкидланишича, «Алитепа» МФЙ ҳудудида жойлашган «Келажак нури» кутубхонаси Эркин Воҳидов номли шахмат мактаби билан ёнма-ён жойлашган бўлиб, ёмғирли кунларда бу биноларнинг том қисмининг маълум қисмига зарар етиб, шахмат мактаби биносининг ички қисмигача ёмғир ўтган. Оқибатда мазкур мактабнинг баъзи бир қисмларига ва электр жиҳозларига зиён етган.
Бу мактабнинг том қисмидаги ҳолат мутахассислар томонидан ўрганилганда кутубхонанинг том қисмида ҳам маълум бир қисмида таъмирланиши зарур бўлган ҳолатлар аниқланган.
«Биноларнинг иситиш ва совитиш тизими асосан электр энергиясида ишлашини ҳисобга олган ҳолда ёғингарчилик бўлганда электр тармоғида қисқа туташувлар оқибатида бу ерга ташриф буюрувчиларнинг ҳаётига ва соғлиғига зиён етиши ҳамда том қисмидаги ҳолат кутубхонанинг ички қисмига ўтиб кетишининг олдини олиш мақсадида таъмирлаш ишларини олиб бориш учун вақтинчалик ёпилган», — дейилади хабарда.
Кутубхонага келаётганлар эса айни вақтда таъмирлаш ишлари олиб борилаётгани сабабли туман марказида жойлашган ФҲДЁ бўлимининг собиқ биносида фаолиятини олиб бориши ҳақида огоҳлантирилмоқда.
ФҲДЁ бўлимининг собиқ биносида зарур шарт-шароитлар яратилиб, китобларнинг маълум бир қисми ушбу бинога олиб келингани маълум қилинди.
