Uzbekistan Airways 18 мартдан 22 мартгача Ўзбекистон бўйлаб амалга ошириладиган маҳаллий авиақатновларнинг эконом ва бизнесс класс тарифларига 21 фоизлик чегирма эълон қилди.

Компания чегирмаларни бирлаштириш (болаларники бундан мустасно) тақиқланишини билдириб, улар 2 ёшгача бўлган болалар учун (ИНФ) амал қилмаслигини эслатиб ўтди.

Таъкидланишича, 2 ёшдан 12 ёшгача бўлган болалар учун 25 фоизлик болалар чегирмасига қўшимча равишда 21 фоизлик чегирма тақдим этилади. Авиачипта қайтарилганда, қайта бронлаштирилганда ёки қайта расмийлаштирилганда тарифга тақдим этилган чегирма авиачиптани қайтариш, қайта бронлаштириш учун ундириладиган йиғимларга нисбатан қўлланилмайди.

Қисман фойдаланилган авиачипта пулини чегирма тугагандан кейинги кунда қайтармоқчи бўлган йўловчи чегирма амал қилган кунда сотиб олган миқдорда қайтариб олади.

Тўлиқ фойдаланилмаган ёки қисман фойдаланилган авиачипталарни қайта расмийлаштирганда, агар жўнаш саналаридан бири чегирма тугаган вақтдан кейинга тўғри келмаса, тўлиқ тариф даражасига чегирмалар қўлланилмайди.