20 февраль куни Хўжайли туманидаги 21-сонли умумтаълим мактаби директори П.А. Тошкент шаҳрида бўлсада, «комиссия учун» деган баҳонада ўқитувчи ва техник ходимлардан 20 мингдан пул йиққан. Бу ҳақида Қорақалпоғистон Республикаси прокукатураси маълум қилди.
Ҳолат бўйича шу куннинг ўзида Хўжайли тумани прокуратураси томонидан терговга қадар текширув ҳаракатлари бошланган.
Прокуратуранинг маълум қилишича, мактаб директори П.А.нинг топшириғига кўра, мактаб ўқитувчиси Д.Р. томонидан 16 нафар ўқитувчидан 320 минг сўм йиғиб, директорга берган, директорнинг ўзи эса, 18 нафар ўқитувчидан 360 минг сўм йиғган. Жами 680 минг сўм пул йиғилган.
Мактаб директори кўрсатмасида ушбу пуллар мактабдаги баннерларни янгисига алмаштириш учун йиғилганини, йиғилган пуллар амалда ҳеч қаерга ишлатилмасдан, ўқитувчиларга яна қайтариб берилганини баён қилган.
Бир гуруҳ ўқитувчилар пулларни йиғилиш сабаблари ҳақида директор берган кўрсатмаларни тасдиқлашган. Лекин уларнинг бир гуруҳи йиғилган пуллар келган комиссияни тушликда овқатлантириш баҳонасида йиғилганини айтиб .Воқеа сабаб директор П.А. 24 февраль куни ўз ихтиёри билан ишдан бўшаш ҳақидаги аризасига асосан лавозимидан озод қилинган.
Ҳозирда, терговга қадар текширув давом этмоқда, натижасига кўра қонуний қарор қабул қилиниши маълум қилинган.
