Туркия ва Суриядаги зилзила қурбонлари сони 50 мингдан ошди
Туркияда 6 февралдаги вайронкор зилзилалар 43 556 кишининг ҳаётига зомин бўлди, деди ички ишлар вазири Сулайман Сойлу. Сурияда эса фаоллар 6747 кишининг ўлимини қайд этган, дея хабар бермоқда DW.
Жаҳон соғлиқни сақлаш ташкилоти маълумотларига кўра, табиий офатдан 23 миллионгача киши жабр кўрган. Табиий офат бўйича экспертлар зилзиладан кўрилган иқтисодий зарарни 20 миллиард доллардан (18,8 миллиард евро) ортиқ деб ҳисоблаган.
Тожикистонда 7,3 магнитудали зилзила қайд этилди
23 февраль куни Тожикистонда маҳаллий вақт билан соат 03:37 да 7,3 магнитудали зилзила содир бўлди, дея хабар қилди РИА Новости. Шунингдек, биринчи силкинишдан кейин 5,5, 6 ва 6,3 магнитудали яна 3 та зилзила содир бўлган.
Шу билан бирга, Европа-Ўртаер денгизи сейсмология маркази 6,8 магнитудали зилзила эпицентри сифатида Мурғобдан 66 км узоқликда жойлашган, қарийб 11 минг киши истиқомат қиладиган нуқтани кўрсатмоқда.
Зилзила кучи 6,8 бўлганлиги ҳақидаги маълумотни Тожикистон Миллий фанлар академиясининг Сейсмология ва сейсмик қурилиш институти тасдиқлаган ва у Сарез кўлидан 40 км узоқликда 05:37 да сезилгани ҳақида хабар берган.
Қурбонлар ва талофатлар ҳақида маълумот берилмади.
Қозоғистонда вертолёт қулаши оқибатида тўрт киши ҳалок бўлди
Қозоғистон фуқаро авиацияси қўмитаси Ғарбий Қозоғистон вилоятининг Чапурино қишлоғидан 6 км узоқликда Ми-8 АМТ вертолёти қулаши оқибатида тўрт киши ҳалок бўлгани ҳақида хабар берди.
«Фавқулодда вазиятлар вазирлигининг қидирув гуруҳи ҳодиса жойига етиб келди. Тўрт киши ҳалок бўлди, икки киши яраланди. Қозоғистон Республикаси Ташқи ишлар вазирлигининг Фуқаро авиацияси қўмитаси вертолётнинг қаттиқ қўниши пайтида ҳалок бўлган фуқароларнинг оила аъзолари ва яқинларига ҳамдардлик билдиради», — дейилади қўмита хабарида.
Молдова МДҲ доирасидаги ўнлаб битимлардан чиқади
Молдова ҳукумати МДҲ доирасидаги бир неча ўнлаб келишувларни денонсация қилиш жараёни бошланганини эълон қилди, дея хабар бермоқда DW.
Республика МДҲнинг 330 га яқин келишувлари иштирокчиси бўлиб, уларнинг кўпчилиги қайта кўриб чиқилиши керак, деди 23 февраль, пайшанба куни телевидениеда ташқи ва Европа интеграцияси вазири Нику Попеску.
«Шундай келишувлар борки, улар ё бизга тўғри келмайди, ё энди ишламаяпти, ё қўлланилмайди, ёки Молдова манфаатига мос эмас», — дея давом этди у.
Қозоғистон чегарасида вабо туфайли назорат кучайтирилди
Бошқа мамлакатларда вабо тарқалиши муносабати билан Қозоғистон чегарада назоратни кучайтирди. Бу ҳақда Соғлиқни сақлаш вазирлиги маълум қилди, деб ёзмоқда Tengrinews.
Вазирликнинг Санитария-эпидемиология назорати қўмитаси юқумли касалликларни эпидемиологик назорат қилиш бошқармаси бошлиғи Роза Кожапова дунёнинг қатор давлатларида вабо билан касалланиш ҳолатлари камайиб бораётганини таъкидлади.
G7 2023 йилда Украинага 39 млрд доллар молиявий ёрдам ажратмоқчи
Катта еттилик давлатлари 2023 йилда Украинага камида 39 млрд доллар молиявий ёрдам бериш ниятида. Бу ҳақда пайшанба куни Бангалорда бўлиб ўтган «Еттилик» гуруҳи (Катта еттилик) мамлакатлари молия вазирлиги ва марказий банклари раҳбарларининг учрашуви якунлари бўйича қабул қилинган қўшма ҳужжатда айтилади, дея хабар қилди ТАСС.
«2023 йил учун Украина ҳукумати эҳтиёжларидан келиб чиқиб, биз бюджет ва иқтисодий қўллаб-қувватлаш бўйича ўз мажбуриятларимизни 39 миллиард долларга оширдик», — дейилади ҳужжатда.
Флоридада жиноятчи бир кунда учта қотиллик содир этди
АҚШнинг Флорида штати Орландо шаҳрида қуролланган шахс томонидан уюштирилган ҳужумлар оқибатида тўққиз ёшли қиз, ёш аёл ва журналист ҳалок бўлди, дея маълум қилди Оранж округи шерифи Жон Мина.
«Икки киши машина ичида ёки унинг ёнида отиб кетилган. Улар — News 13 мухбири ва фотомухбири. Улар эрталабки қотилликни ёритган жойда бўлишган. Уй ичида бир аёл ва тўққиз ёшли қиз отиб кетилган. Афсуски, News 13нинг бир ходими вафот этди», — деди у брифингда.
ЖССТ: Дунёда ҳар 2 дақиқада бир аёл ҳомиладорлик ёки туғиш пайтида вафот этади
Жаҳон соғлиқни сақлаш ташкилоти ҳисоботига кўра, дунёда ҳар 2 дақиқада бир аёл ҳомиладорлик ёки туғиш пайтида вафот этади, 2015 йилдан бери бу рақамлар ўзгармаган ва баъзи ҳудудларда ҳатто ошган.
2000 йилдан 2020 йилгача миллий, минтақавий ва глобал миқёсда оналар ўлимини кузатувчи ҳисобот 2020 йилда дунё бўйлаб қарийб 287 минг оналар ўлимини қайд этгани, 2016 йилда бу кўрсаткич 309 мингга яқин бўлганини кўрсатади.
БМТ маълумотларига кўра, 2020 йилда оналар ўлимининг қарийб 70 фоизи Саҳрои Кабирдан жанубий Африкагача бўлган минтақаларда содир бўлган.
Афғонистон шимолида қор кўчкиси оқибатида тўрт киши ҳалок бўлди, 30 та уй вайрон бўлди
Афғонистон шимолидаги Бадахшон вилоятидаги икки қишлоқда содир бўлган қор кўчкиси оқибатида тўрт нафар оила аъзоси ҳалок бўлди, 30 та уй вайрон бўлди, дея хабар берди Синьхуа.
Чоршанба куни Кўфаб туманида содир бўлган қор кўчкисидан сўнг ҳукумат жабрланган ҳудудларга кам таъминланган оилаларга ёрдам кўрсатиш учун маблағ ва инсонпарварлик ёрдамини жўнатди, деди табиий офатларни бошқариш ва гуманитар масалалар бўйича вилоят бошқармаси бошлиғи Мавлавий Муҳаммад Акрам Акбарий.
Охирги бир ой давомида Афғонистон бўйлаб кучли қор, аёз ва қор кўчкилари оқибатида 200 га яқин одам, жумладан, болалар ҳалок бўлди. Биргина Бадахшон вилоятида 30 дан ортиқ одам ҳалок бўлган
