Тошкент шаҳри Яккасарой туманида 20 февраль куни янги қурилаётган бино ишчилари ўртасида оммавий жанжал юз берди. Бу ҳақда Milliy TV телеканалининг «Миллар» дастурида хабар берилди.
Қайд этилишича, Жиззах вилоятидан пойтахтга келиб ишлаётган йигитларнинг 2−3 нафари ўртасида келишмовчилик содир бўлган. Аммо бошқаларнинг ҳам аралашуви оқибатида вазият оммавий тус олган.
Жанжал пайтида туман профилактика инспектори етиб келиб, йигитларни ажратмоқчи бўлган, лекин улар ходимга қаршилик кўрсатган.
Жиноят ишлари бўйича Яккасарой тумани суди 21 февраль куни ҳолат юзасидан маъмурий ишни кўриб чиқди. Бунда 28 кишининг иши судда кўрилди, қолган иштирокчиларга нисбатан безорилик ҳолати бўйича суриштирув ишлари олиб борилмоқда.
Суд қарори билан Маъмурий жавобгарлик тўғрисидаги кодекснинг 194-моддаси (Ички ишлар органлари ходимининг қонуний талабларини бажармаслик) 1-қисми ва 195-моддаси (Ички ишлар органлари ходимларининг ўз хизмат бурчларини бажаришларига қаршилик кўрсатиш)да кўрсатилган ҳуқуқбузарликларни содир қилган деб топилиб, йигитларнинг 2 нафарига 15 ва қолганларига 10 суткадан маъмурий қамоқ жазоси тайинланди.
