Ижтимоий тармоқларда Тошкент шаҳри Юнусобод туманидаги Анҳор канали бўйида жойлашган тарихий объект ёнида қурилиш ишлари олиб борилаётгани кўплаб муҳокамаларга сабаб бўлди.
Блогер Никита Макаренко қурилаётган бино ёнида архитектор Дмитриевнинг 50-йилларда Навоий кўчаси ансамбли билан биргаликда қурилган «Ўрда чойхонаси» жойлашганини қайд этди.
Davletovuz канали муаллифи Қобил Хидиров анҳорлар халқнинг, жамоатчиликнинг мулки эканини, қурилиш тарихий бинога зиён етказибгина қолмасдан, анҳорнинг табиий қиёфаси уйғунлигига ҳам путур етказаётганини ва у зудлик билан тўхтатилиши лозимлигини таъкидлади.
«У жамоатчилик макони сифатида ривожлантирилиши, сақлаб қолиниши, тадбиркорлар қўлига умуман берилмаслиги лозим. Экологиямиз йилдан-йилга ёмонлашиб бораётган бир пайтда анҳорлар бўйининг бетонсевар тадбиркорларга берилиши кечириб бўлмас жиноятдир. Ўзи умуман, Тошкентдаги мавзелар, маҳаллалар ичидаги ҳамда анҳорлар бўйидаги барча қурилишларга мораторий эълон қилиниши керак. Бўлди, осмондан бир томчи тушса, шаҳар лойга, қуёш чиқса чангзорга айланяпти», — деб ёзади у.
Фото: Эффект Макаренко / Telegram
Ўзбекистон архитекторлар уюшмаси аъзоси, архитектор Александр Куранов ҳам ҳолатга муносабат билдирди:
«Бу жой тошкентликларнинг севимли жойи эди. Ушбу ваҳшийликнинг барча иштирокчиларининг исмлари эълон қилиниши керак. „Янги Ўзбекистон“ монументи Мовий гумбазлар хиёбонидан кўчирилишига эришилди. Анҳор канали соҳилида ҳам худди шундай оммавий акция керак. Бу одатий ҳолга айланмаслиги учун бунга рози бўлганлар ҳам қонун доирасида тўлиқ жазоланиши керак», — деди у.
Шундан сўнг, Қурилиш ва уй-жой коммунал хўжалиги вазирлиги матбуот хизмати Тошкент шаҳри Юнусобод тумани Алишер Навоий кўчаси 2а-уйда жойлашган ушбу объект бўйича муносабат билдирдирар экан, объект мутасаддилари бир неча бор огоҳлантириб келинганини маълум қилди.
Тошкент шаҳар ҳокимининг 2014 йил 14 майдаги Toshkent o’rdasi масъулияти чекланган жамиятига Анҳор канали бўйидаги ўзларига тегишли ҳудудда жойлашган қаҳвахона биносини канал муҳофаза ҳудудини сақлаган ҳолда қайта қуриш учун 406-сонли қарори қабул қилинган.
Пойтахт Архитектура ва қурилиш бош бошқармаси томонидан 2014 йил 4 июлда архитектура-режалаштириш топшириғи ишлаб чиқилган ҳамда шаҳар Қурилиш бош бошқармасининг лойиҳа-смета ҳужжатларини келишиш бўйича Архитектура ва шаҳарсозлик кенгаши ишчи органи томонидан 2021 йил 5 августда хулоса асосида лойиҳа ҳужжатлари келишилган.
Бироқ қурилиш объектида Вазирлар Маҳкамасининг 2022 йил 20 апрелдаги қарорига мувофиқ «Қурилиш-монтаж ишларини бошлаш учун объектни рўйхатдан ўтказиш бўйича давлат хизматлари кўрсатишнинг маъмурий регламенти»га асосан назорат инспекциясидан рўйхатдан ўтмасдан қурилиш-монтаж ишлари бошлаб юборилган.
Ҳудуднинг 2021 йил апрель ойидаги сунъий йўлдош тасвири. Харита: Google Earth.
Ҳудуднинг 2022 йил февраль ойидаги сунъий йўлдош тасвири. Харита: Google Earth.
Ҳудуднинг 2021 йил апрель ойидаги сунъий йўлдош тасвири. Харита: Google Earth.
Шу боис Toshkent o’rdasi МЧЖнинг маъсул шахсига нисбатан Маъмурий жавобгарлик тўғрисидаги кодекснинг 99-моддаси билан 2022 йилда маъмурий жавобгарликка тортилган.
Шунингдек, 2023 йилда объект такроран жойига чиқиб ўрганилганда ҳам қурилиш-монтаж ишларини бошлаш учун белгиланган тартибда рўйхатдан ўтмасдан қурилиш ишлари олиб борилаётгани аниқланган. МЧЖ мансабдор шахси нисбатан ноқонуний қурилиш ишларини зудлик билан тўхтатиш бўйича огоҳлантирилган ва қурилиш ишларига масъулларга тушунтириш ишлари олиб борилган.
«Ҳозирда маъмурий жавобгарлик тўғрисидаги кодекснинг 99-моддасига кўра масъулларни қайта маъмурий жавобгарликка тортиш чоралари кўрилаётганлигини ҳамда объектда қурилиш ишлари тўхтатилганини маълум қиламиз», — дейилади хабарда.
