26 январь куни президент Шавкат Мирзиёев «Озиқ-овқат технологияси ва муҳандислиги халқаро институтини ташкил қилиш чора-тадбирлари тўғрисида»ги [ПҚ-22-сонли] қарорга имзо чекди. Бу ҳақда Адлия вазирлиги хабар бермоқда.

Қарор билан озиқ-овқат саноати билан боғлиқ 3 та муассаса ташкил топмоқда. Булар:

  • Озиқ-овқат технологияси ва муҳандислиги халқаро институти;
  • Институт ҳузурида Агробизнес субъектлари салоҳиятини ошириш маркази — Capacity Building Center;
  • Озиқ-овқат технологияси ва муҳандислиги халқаро институти ҳузуридаги Қўқон озиқ-овқат саноати ва хизмат кўрсатиш техникуми.

Институтнинг асосий вазифаларидан бири озиқ-овқат маҳсулотларини қайта ишлаш соҳасида кичик ва ўрта бизнес учун рақобатбардош технологиялар, жараёнлар ва тармоқларни ривожлантирадиган мукаммал технологлар, етук кадрлар ва бизнес раҳбарларини тайёрлаш ҳисобланади. Муассасада ўқитиш инглиз, рус ва ўзбек тилларида бўлади. Кундузги, сиртқи ва масофавий таълим шакллари мавжуд.

Шунингдек, 2024−2025 ўқув йилидан институтда бакалавриат таълим йўналишлари бўйича дуал таълим тизими жорий қилинади.

2024 йил 1 январдан институтнинг илмий салоҳиятини ошириш учун озиқ-овқат саноати ва уни қайта ишлаш бўйича илмий педагогик кадрлар (таянч докторантура (PhD) ва докторантура (DSc) тайёрлаш тизими йўлга қўйилади.

Телеграмдан фойдаланасизми? Муҳим янгиликларни ўтказиб юбормаслик учун каналимизга аъзо бўлинг.

Техникумни муваффақиятли тамомлаган битирувчилар институтга соҳага мос бўлган бакалавриат таълим йўналишлари бўйича кириш имтиҳонларисиз якка тартибдаги суҳбат орқали 2-курсдан тўлов-контракт асосида қабул қилинади.