Ижтимоий тармоқларда 30 ноябрь куни ярим тунда Тошкентнинг Олмазор туманида пичоқлаб кетилган профилактика инспектори рашк қурбони бўлгани ҳақидаги хабарлар тарқалди. Тошкент шаҳар Ички ишлар бош бошқармаси матбуот хизмати ҳолат бўйича асосланмаган хабарлар тарқалаётганини маълум қилди. Қотилликда гумонланаётган муқаддам судланган фуқаро ходимга тажовуз қилгач, воқеа жойидан қочиб кетган ва ҳозир қўлга олинган.

Ижтимоий тармоқларда эса унинг аёл билан автомашинасида гаплашиб ўтирган вақтида, аёлнинг турмуш ўртоғи келиб қолиб, рашк оқибатида қотиллик содир этгани ҳақида асоссиз хабар тарқатилган.

Бироқ, жиноятни ўрганиш жараёнида аниқланишича, марҳум профилактика инспектори жабрланувчи аёлнинг чақирувига асосан воқеа жойига борган. Аёл ўзининг шаръий никоҳидаги турмуш ўртоғи ўлдириш билан қўрқитаётганлигини ва унга чора кўришни сўраган.

Профилактика инспектори хабарни расмийлаштириш мақсадида жабрланувчини ўз автомашинасида маҳалла идорасида жойлашган таянч пунктга олиб келганда, ортидан шахсий транспортида етиб келган Б.З. профилактика инспекторига ўзи билан олиб келган ошхона пичоғи билан ҳужум қилган. Бу вақтда аёл қочишга улгурган. Профилактика инспектори ўз ҳаётини қурбон қилиш эвазига аёлнинг ҳаётини сақлаб қолган.

Баён этилган ҳолат тегишли видеотасвирларда ва гувоҳларнинг кўрсатмаларида акс этган, дейилади хабарда.

ИИББ гумонланувчининг яқинлари ёки учинчи шахслар томонидан воқеа тафсилотларига турли талқин берилиши мумкинлиги ва бу маълумотлар текширилиб қонуний баҳо берилишини маълум қилди.

Тергов якунланмагунга қадар жамоатчилик ва ОАВдан турли тахмин ва миш-мишлардан иборат шахсларнинг шаъни ва қадр-қимматини камситилишига олиб келадиган ахборотни тарқатмасликларини сўраймиз, дейилади ИИББ хабарида.