АҚШ давлат котибининг Жанубий ва Марказий Осиё бўйича ёрдамчиси Дональд Лу минтақа бўйлаб сафари доирасида шу ҳафта Ўзбекистонга ташриф буюради.
Мамлакат давлат департаменти матбуот хизмати хабарига кўра, Туркманистон ва Қозоғистонни ҳам қамраб оладиган ташриф давомида Марказий Осиёда иқтисодий барқарорлик ташаббусини йўлга қўйиш масаласи муҳокама қилинади. Ушбу ташаббус орқали АҚШ минтақавий савдо йўллари ва салоҳиятини мустаҳкамлаш, малакали ишчиларни ўқитиш ва тайёрлаш ҳамда минтақага халқаро инвестицияларни жалб қилиш учун 25 миллион доллар маблағ ажратади.
Дональд Лу ҳукумат ва фуқаролик жамияти вакиллари билан учрашиб, бошқа масалалар қаторида аёллар ва қизларнинг ҳуқуқларини кенгайтириш, дин ва эътиқод эркинлигини муҳокама қилиши режалаштирилган.
Эслатиб ўтамиз, Дональд Лу шу йилнинг май ойида Ўзбекистонга ташриф буюрганди. Музокараларда икки томонлама ҳамкорлик масалалари, Ўзбекистоннинг ЖСТга аъзо бўлиши, Россияга қарши санкцияларнинг мамлакат ривожига таъсири ва бошқалар муҳокама қилинганди.
