Германия халқаро агентлиги — GIZнинг «Марказий Осиёда савдо тартиботларини соддалаштириш» минтақавий лойиҳаси доирасида Давлат божхона қўмитасининг «Яллама» чегара божхона постига қиймати салкам 100 минг АҚШ долларини ташкил қилувчи божхона назоратининг техник воситалари ажратилди. Бу ҳақда Давлат божхона қўмитаси маълум қилди.
Шу муносабат билан Давлат божхона қўмитасида ташкил қилинган топшириш-қабул қилиш тадбирида Германия халқаро агентлиги директори Иоахим Фриц ҳамда лойиҳа раҳбари Фелицитас Зик иштирок этди.
Қўмита раиси ўринбосари Отабек Чориев сўнгги йилларда ушбу ташкилот билан ўзаро ҳамкорлик фаол босқичга кўтарилганини таъкидлади.
Тақдим этилган янги техник воситалар кўмагида божхона назорати ва расмийлаштируви жараёнларини соддалаштириш, замонавий рациялар орқали ўрнатиладиган тезкор алоқа канали эса ташқи иқтисодий фаолият иштирокчиларига кўрсатиладиган хизматлар тезкорлигини ошириш имкониятини беради, дейилади хабарда.
