Сешанба куни ижтимоий тармоқларда тарқалган Ангрен шаҳрида юзлаб Spark`лар йиғилиб тургани акс этган суратлар бўйича UzAuto Motors муносабат билдирди.
Компания хабарига кўра, суратда аллақачон мижозлар томонидан шартнома тузилган ва кейинчалик мижозга етказиб бериш учун Ангрен шаҳрига етказилган автомобиллар кўрсатилган.
«Ангрен шаҳридаги юк ортиш ва тушириш терминали UzAuto Motors`нинг таркибий бўлинмаси бўлиб, автомобилларни Қамчиқ довонининг ғарбидаги дилерлик марказларига тарқатилишидан олдин транзит сақлаш учун мўлжалланган. Тез орада Chevrolet Nexia автомобиллари ҳам Ангрен шаҳрига мижозларга етказиб бериш учун жўнатилади», — дейилади хабарда.
Қўшимча қилинишича, 20 август куни Chevrolet Nexia ва Spark учун шартнома бериш бошланганидан сўнг ўша куннинг ўзидаёқ барча мавжуд автомобиллар учун жами 12 600 та — 8 200 дона Spark ва 4 400 дона Nexia автомобили учун шартома тузилган.
Эслатиб ўтамиз, UzAuto Motors конвейерларнинг янги автомобиль моделларини ишлаб чиқаришга ўтказилиши муносабати билан, 2022 йил якунида Chevrolet Spark ва Nexia автомобилларини ишлаб чиқариш тўхтатилишини маълум қилди. Уларнинг ўрнини Chevrolet Tracker ва Onix эгаллаши кутилмоқда.
