21 июль куни ижтимоий тармоқларда Самарқанд вилоятининг Самарқанд туманида икки эркак икки аёлни уриб тан жароҳати етказгани акс этган видео тарқалди. Мазкур ҳолатга вилоят ИИВ 29 июль куни изоҳ берди.
Унда Янгиариқ МФЙ ҳудудида 1980 ва 1987 йилда туғилган икки эркак 1991 йилда туғилган икки аёл билан юзага келган келишмовчилик оқибатида ўзаро жанжаллашиб қолгани, эркаклар уларни уриб, тан жароҳати етказишгани қайд этилган.
Kun.uz ўтказган суриштирувга кўра, воқеа юз берган Самарқанд тумани Янгиариқ маҳалласи ҳудудидаги айланма йўл ёқаси 10 йиллардан буён мардикор бозор бўлиб келган. У ерда бир томонда эркаклар, бир томонда аёллар йўл четида туриб, кунлик ишларга жалб қилинган.
Таъкидланишича, пастдарғомлик йигитлар эрталаб «Газель» машинасида қишлоқлардан ёш-у қари аёлларни шу ерга кунлик ишга олиб келиб, кун қорайганда олиб кетишаркан, улар «бригадир» деб аталар экан. Жанжал эса 21 июл куни соат 17:00 лар атрофида шу ердаги мардикор аёллар гуруҳи ичидаги келишмовчилик оқибатида юзага келган.
Асли Пастдарғом туманидан бўлган, Кимёгарлар қўрғонида ижара уйда яшовчи 33 ва 25 ёшли опа-сингилни гўёки ўша «Газель»да мардикорларни олиб келувчи «бригадир» аёллардан бири ҳақорат қилган. Ўртада чиққан жанжалдан сўнг, опа-сингиллар у аёлни М37а йўлидаги машиналар турган жойгача таъқиб қилиб боришган.
«У «бригадир» аёл мени қаттиқ ҳақорат қилди. У йўл четида турган икки «Газель»дан бирининг ичига яширинди. Машинага чиқмоқчи бўлсак «машинамга қадамингни босиб ҳаром қилма» қабилида яна ҳақоратлар эшитдик, бизни туртиб, уриб ташлашди. Ҳа, сўнгра жаҳл устида машиналарга тош отдик», — деди калтакланган аёллардан бири.
Машина ҳайдовчиларидан бири ва дастлаб ўша ердаги жанжални ажратишга уринган йигит ўзларига ёпишаётган опа-сингилларни итариб ташлаган, шундан сўнг, уни ҳақоратлаган аёлларни ура бошлаган. Сингил олган зарбалари таъсирида ҳолдан тойиб, ер устида ётиб қолган.
«Ўша куни машинани қўйиб, келсак, шу аёллар бақир-чақир қилиб қолди. Улар бир аёлни судраб ташлади. Кейин биз уларни ажратдик. Калтакланган аёл келиб машинага чиқаман дегунча бошқалари ойналарга тош отиб, қўлидаги белкурак ва „профиль“ билан уриб, машинанинг тепасини пачоқ қилиб ташлади. Улар машина ичидаги аёлларга тош отгандан кейин мен бордимда, итарвордим. Кейин биттаси келиб оёғимга тармашди. „Торт қўлингни“ деб тепгандим, унисининг кўкрагига тегди», — деди аёлларни калтаклаган эркаклардан бири.
Унинг сўзларига кўра, у аёлларга машинага шикаст етказгани учун куч ишлатган. Аёллар эса автомобилни тузатиб беришга пули йўқлигини таъкидлашган. Ҳайдовчининг айтишича, таъмирлашга ўз ёнидан 9,6 млн сўм сарфлаган.
Келтирилишича, транспорт воситалари суриштирув ишлари якунига етгунича жарима майдончасига қўйилган.
Иккинчи «Газель» машинаси эгасининг айтишича, ҳеч қанақа жанжалга аралашмаган бўлса-да, унинг машинасига ҳам тош отилиб, 3,5 млн сўм миқдорда зарар етказилган.
Репортажда дўппосланган аёллардан бири ўша куни пиво ичганини тан олгани ва «бригадир» аёл келиб уни ҳақорат қилмаганида жанжал юзага келмаган бўлиши мумкинлигини таъкидланган.
У «бригадир аёллар» ишчи-аёлларни арзон-гаровга ишга жўнатишини маълум қилди. Бунинг учун эса улардан одам бошига 15 минг сўмдан ҳақ олишган. Мардикор аёллар эса кунлик ишда камида 100 минг сўм топиш учун курашишган. Эътиборлиси, воқеа иштирокчилари — опа-сингиллар бошқа бир аёлнинг 4 ва 1,5 ёшли болаларига ҳам энагалик қилишган.
Блогерлар ва нашрларда тарқалган — калтакланиб, ерда ётган аёл тепасида турган болакай унинг фарзанди эмаслиги маълум бўлди. У болани 5 ойлигидан буён қараб, катта қилиб келаётганини қайд этди.
Аёллар ўзларини дўппослаган йигитлар билан бир ҳудудда истиқомат қилгани боис, улардан даъволари йўқлигини ҳам айтган.
Ҳолатга гувоҳ бўлган мардикор аёллардан бири жанжални қуйидагича изоҳлади: «Бу пулдорлар қишлоқлардан ёш қизлар ва аёлларни йиғиб келишади, фермерларга 15 минг сўмдан ҳисоблаб топширишади. Бизни қари, ишлай олмайди, деб иш берувчиларни айнитишади. Бизлар ҳам одам-ку, биз ҳам нон ейишимиз керак, рўзғоримиз бор. Участка нозирлари ҳам улар тараф бўлади, шунча одамни иш билан таъминлаяпти, деб. Улар холис ўртада туриши керак, ҳеч кимга ён босмасдан», — дейди у.
Опа-сингиллар билан Самарқанд вилояти ҳокими ўринбосари, оила ва хотин-қизлар бошқармаси бошлиғи Зебинисо Раҳмонова ҳам суҳбатлашди.
Зебинисо Раҳмонова.
«Бу ерда эркакларнинг аёвсиз калтаклагани — нохуш ҳолат. Нима бўлган тақдирда ҳам эркакларнинг аёлларни калтаклаши зўравонликдан бошқа нарса эмас. Албатта, қонун бор, қоида бор. Ўша келишмовчиликни тегишли ташкилотлар билан ечиш мумкин эди. Шунинг учун ўзим шахсан ҳолатни қоралайман. Мана шу калтаклаган эркакларга нафратим ошди», — деди у.
Зебинисо Раҳмонованинг сўзларига кўра, аёлларни ишга жойлаштириш чоралари кўрилади. «Мана мономарказимиз бор. Унда параллель равишда ўқитиб, яна ўйлаб кўрамиз, «дафтар"лардан бирортасига киритамиз. Шу билан бирга уй-жой муаммоларини ҳал қилишни ўзим назоратга оламан», — деди у.
Самарқанд вилоят ИИБ ЖХХ ҳуқуқбузарликлар профилактикаси бошқармаси катта инспектори Нилуфар Сатторова эса воқеа юзасидан суриштирув ишлари олиб борилаётганини таъкидлаб ўтди.
Эслатиб ўтамиз, ҳолатга Сенатнинг Хотин-қизлар ва гендер тенглик масалалари қўмитаси раиси Малика Қодирхонова муносабат билдириб, ҳуқуқбузарларга нисбатан қонунчиликда белгиланган тартибда, албатта, тегишли жазо чораси қўлланилишини маълум қилганди.
