18 июль куни Самарқанд вилоятининг Ургут туманидаги тўйхоналарнинг бирида фуқаролар овқатдан заҳарланди.
Бош прокуратура матбуот котиби Ҳаёт Шамсутдинов мазкур хабарга муносабат билдириб, тармоқларда тарқалгандек 200 киши эмас, балки 10 киши заҳарланганини маълум қилди.
Тўйга борган 56 ёшли аёл 19 июль куни «ўткир овқат токсикоинфекцияси» ташхиси билан шифохонага мурожаат қилган. Унга тез тиббий ёрдам кўрсатилган.
Қолаверса, у билан бирга бўлган бир нечта фуқароларнинг хонадонларига борилиб, шифохонага таклиф қилинган ва текширувдан ўтказилган.
Текширувда яна 10 киши — 9 нафари аёл, 1 нафари эркакка «Енгил овқат токсикоинфекцияси» ташхиси қўйилди. Уларнинг соғлиғи тўлиқ яхшиланган ва 20 июль куни уйларига жавоб берилган, дейилади хабарда.
Ҳозир шифохонада фақатгина дастлаб мурожаат қилган бемор аёлга тиббий ёрдам кўрсатилмоқда, унинг аҳволи яхшиланаётгани қўшимча қилинди.
Ҳолат юзасидан Ургут тумани прокуратураси терговга қадар текшириш ҳаракатларини ўтказмоқда.
