Ўзбекистон президенти Шавкат Мирзиёев душанба куни мамлакат Бош қонунига ўзгартириш киритиш ва ташкилий чора-тадбирларни амалга ошириш юзасидан конституциявий комиссия аъзолари билан бўлиб ўтган учрашувда Конституцияга ўлим жазосини тақиқлаш тўғрисидаги нормани киритишни таклиф қилди. Бу ҳақда унинг матбуот котиби Шерзод Асадов хабар берди.

«Тарихий тажриба шуни кўрсатадики, инсоннинг қадр-қиммати аввало унинг табиий яшаш ҳуқуқида намоён бўлади. Бу — энг улуғ ва муқаддас қадриятларимиздан биридир», — деди президент.

«Маълумки, биз ўлим жазоси тайинланадиган жиноятлар сонини босқичма-босқич камайтириб, бу жазони тўлиқ бекор қилдик. Шунга қарамай, айрим фуқаролар томонидан ўлим жазосини тиклаш, уни жиноят қонунчилигига қайта киритиш ҳақида таклифлар ҳам илгари сурилмоқда», — деди Шавкат Мирзиёев.

У демократик ва инсонпарвар ғояларни олий қадрият даражасига кўтарган дунёдаги аксарият давлатлар ўлим жазосини бекор қилганини эслатди. «Чунки яшаш ҳуқуқи — ҳар бир инсоннинг табиий ҳуқуқи бўлиб, унга бу ҳуқуқни давлат эмас, Яратганнинг ўзи ато этган».

«Агар сизлар қўллаб-қувватласангиз, Конституциямизга „Ўзбекистонда ўлим жазоси тақиқланади“, деган яна бир муҳим нормани киритишни таклиф қиламан. Шу тариқа, биз бу ўта жиддий масалада ҳеч қачон ортга қайтмаслигимизни, инсонпарварлик ғояларига содиқ эканимизни бутун дунёга яққол намоён қиламиз», — дея таъкидлади Шавкат Мирзиёев.