Time журнали турли йўналишлар бўйича йилнинг энг нуфузли инсонлар 100 талигини эълон қилди. Ушбу рўйхатга кирганлар бир неча категорияларга бўлинган — «Титанлар», «Етакчилар», «Санъаткорлар», «Пионерлар», «Кумирлар», «Инноваторлар».
«Титанлар»
Фото: Times
«Титанлар» номинациясида Apple бош директори Тим Кук дунёнинг энг йирик компанияларидан бирини муваффақиятли тарзда бошқараётгани, компания маҳсулотларининг замонавий дунёда катта таъсирга эканлиги сабабли энг нуфузли инсонлардан бири сифатида эътироф этилди.
Шунингдек, ушбу номинация бўйича энг нуфузли инсонлар сафидан америкалик телебошловчи, актриса Опра Уинфри, Amazon бош директори Энди Жесси, FTX криптобиржаси асосчиси Сэм Бэнкман-Фрид, ирландиялик ёзувчи Салли Руни, кинорежиссёр Хван Донг Хёк («Кальмар ўйини» сериалини суръатга олган), Крис Женнер (Ким Кардашьян, Кайли Женнер каби моделларнинг онаси), Warner Bros бош директори Дэвид Заслав, Европа Марказий банки президенти Кристин Лагард, малайзиялик актриса Мишель Йео, Adani Group конгломерати асосчиси Гаутам Адани каби инсонлар жой олишди.
«Етакчилар»
Фото: Time
«Етакчилар» номинациясида Барбадос бош вазири Миа Моттли эътироф этилди. Бундан ташқари ушбу категориядан Россия президенти Владимир Путин, Украина президенти Владимир Зеленский, Хитой президенти Си Цзиньпин, Европа комиссияси раҳбари Урсула фон дер Ляйен, АҚШ президенти Жо Байден, комик ва подкастлар муаллифи Жо Роган, Германия федерал канцлери Олаф Шольц, Танзания президенти Самия Сулуху, Чили президенти Габриэль Чорич ва бошқалар жой олишган.
Рўйхатга кирган ҳар бир шахс ҳақида қисқача мақола ҳам берилган. Владимир Путин ҳақидаги матнни Алексей Навальний, Владимир Зеленский ҳақида эса Жо Байден ёзган. Жо Байден ҳақидаги матнни эса АҚШнинг собиқ президенти Билл Клинтон ёзган.
«Санъаткорлар»
Фото: Times
Ушбу номинацияда канадалик актёр Симу Лю («Шан-чи ва ўнта ҳалқа афсонаси» фильмида роль ижро этган) эътироф этилди. Шу билан бир қаторда «санъаткорлар» категориясида актёрлар Эндрю Гарфилд, Ченнинг Таттум, Жереми Стронг, актрисалар Сара Джессика Паркер, Аманда Сейфрид, Мила Кунис, комик актёр Пит Дэвидсон актриса ва хонанда Зои Кравиц кабилар энг нуфузли деб топилди.
«Пионерлар»
«Пионерлар» номинациясида баскетболчи Кэндис Паркер етакчи сифатида эътироф қилинди. Шунингдек, ушбу категория бўйича Facebook (Meta) нинг ички ҳужжатларини Wall Street Journal`га очиқлаган компаниянинг собиқ ходими Френсис Хауген, мусиқачи Questlove, Moderna бош ижрочи директори Стефан Бансель, иқтисодчи Эмили Остер ва бошқалар йилнинг энг нуфузли инсонлар рўйхатига киритилган.
«Кумирлар»
Ушбу номинация бўйича етакчи сифатида америкалик хонанда Мэри Жей Блайж рўйхатга киритилган. «Кумирлар» категориясида, шунингдек, «Новая газета» бош муҳаррири Дмитрий Муратов, хонанда Адель, актёр Киану Ривз, теннисчи Рафаэль Надаль каби инсонлар эътироф этилган.
«Инноваторлар»
«Инноваторлар» номинанациясида актриса Зендая етакчи сифатида рўйхатнинг юқори қисмидан жой эгаллаган. Шу билан бирга, ушбу номинацияда янги зеландиялик актёр, кинорежиссёр Тайка Вайтити, Wordle ўйинини яратган дастурчи-муҳандис Жош Уордл, Atlassian (Jira, Trello каби лойиҳаларни яратган компания) бош директори Майк Кэннон-Брукс, Nubank онлайн-банки асосчиси Дэвид Велес каби инсонлар йилнинг энг нуфузли 100 та инсонлари рўйхатига киритилган.
