Forbes нашри ўтган 12 ой ичида энг кўп ҳақ олган атлетларнинг ўнталик рейтингини эълон қилди. Унга кўра, рўйхатни ПСЖ ҳамда Аргентина миллий жамоаси футболчиси Лионель Месси бошқариб турибди. Ҳужумчи 130 млн доллар ишлаб топган. Юқори учталикка «Лос-Анжелес Лейкерс» баскетболчиси Леброн Жеймс (121,2 млн доллар) ва «Манчестер Юнайтед» ҳужумчиси Криштиану Роналду (115 млн доллар) кирган.
Лео Месси ўтган йил августда 17 йиллик фаолиятдан сўнг «Барселона»ни тарк этиб, ПСЖ футболчисига айланди. У Парижда охирги мавсумда «Барса»да олган маошига нисбатан сезиларли (22 млн доллар — 75 млн доллар) равишда кўпроқ пул топиб, солиқлар билан ҳисоблаганда Forbes’нинг энг даромадли атлетлар рўйхатида етакчи бўлди.
Мессининг азалий рақиби Криштиану Роналду ҳам клубини алмаштирди. У август ойида «Ювентус»дан собиқ жамоаси «Манчестер Юнайтед»га кўчиб ўтди. Роналду ўтган 12 ойда 115 млн доллар ишлаб, 3-ўринни эгаллади. Иккинчи ўриндаги «Лос-Анжелес Лейкерс» баскетболчиси Леброн Жеймс ўтган йилги рекордини янгилаб, 121 млн доллар ишлаб топди. Бу билан Жеймс даромади бир йилда 100 млн доллардан ошган ўнинчи спортчи бўлди, Месси ва Роналду бу маррага беш мартадан эришган.
Forbes маълумотларига кўра, дунёдаги энг кўп маош олувчи спортчилар ўнталиги сўнгги 12 ой ичида 991,6 млн доллар ишлаб топди. Бу 2021 йилга (1 млрд 52 млн доллар) нисбатан 6 фоизга пасайиш демакдир. Энг кўп даромадли атлетлар бу йил ишлаб топган сумма ушбу рейтинг юритилишни бошлагандан буён учинчиси бўлди: 2018 — 1 млрд 59,4 млн доллар, 2021 йил 1 млрд 52 млн доллар ва бу йил 991,6 млн доллар. Ўз навбатида, спорт юлдузлари ҳар доимгидан ҳам яхши ишлашмоқда. Сабаби бу йил ўнталикдаги сўнгги кўрсаткич 2021 йилдаги (75 млн доллар) суммадан 8 фоизга, 2019 йилдаги (65,4 млн доллар) суммадан 24 фоизга кўпроқ бўлди.
Спортчилар ўз жамоаларидаги маошларидан кўра кўпроқ маркетинг орқали даромадга эга бўлмоқда. Эндиликда атлетлар криптовалюталар ҳамда NFT платформаси орқали ҳам мўмай пул ишламоқда. Хусусан, Лео Месси Socios блокчейн компанияси билан 20 млн долларлик келишувга эришган бўлса, «Голден Стэйт Уорриорз» баскетболчиси Стефен Карри, «Тампа-Бэй Бакканирс»нинг собиқ ўйинчиси Том Брэди FTX криптовалюта алмашинувчиси билан шартномага эришган. Баскетболчилар Леброн Жеймс ва Кевин Дюрант ҳам мос равишда Crypto.com ва Coinbase билан реклама битимлари имзолаган. Шунингдек, атлетлар компаниялардан олган даромади ва сотган акциялари ҳисобидан 500 млн доллар ишлаб топган. Бу ўтган йилдаги 512 млн доллардан унча фарқ қилмайди.
Forbes эълон қилган энг даромадли Топ-10 атлет:
- Лионель Месси, футбол, ПСЖ, 130 млн доллар;
- Леброн Жеймс, баскетбол, «Лос-Анжелес Лейкерс», 121,2 млн доллар;
- Криштиану Роналду, футбол, «Манчестер Юнайтед», 115 млн доллар;
- Неймар, футбол, ПСЖ, 95 млн доллар;
- Стефен Карри, баскетбол, «Голден Стэйт Уорриорз», 92,8 млн доллар;
- Кевин Дюрант, баскетбол, «Бруклин Нетс», 92,1 млн доллар;
- Рожер Федерер, теннис, Швейцария, 90,7 млн доллар;
- Сауль Альварес, бокс, Мексика/АҚШ, 90 млн доллар;
- Том Брэди, американча футбол, 2022 йил «Тампа-Бэй Бакканирс» сафида фаолиятини тугатди, 83,9 млн доллар;
- Яннис Адетокунбо, баскетбол, «Милуоки Бакс», 80,9 млн доллар.
Қайд этилишича, рейтингда спортчиларнинг маоши, мукофот пуллари, бонуслар ҳамда имиж ҳуқуқларининг фойдаланишдан олинган реклама даромади ҳисобга олинган.
Эслатиб ўтамиз, Forbes январь ойида энг кўп ҳақ оладиган спортчи аёллар рўйхатини тақдим этганди. Рейтингда япониялик теннисчи Наоми Осака кетма-кет иккинчи йил биринчи бўлди. У 57 млн доллардан ортиқ пул ишлаган бўлиб, 55 млн долларини ҳомийлик шартномаларидан олган, 2,3 млн долларни эса мусобақаларда ишлаб топган.
