Эндиликда «Тошкент» халқаро аэропортига келган йўловчилар ўз багажларини онлайн-эфир орқали томоша қилиш имконига эга бўлдилар. Бу ҳақда Uzbekistan Airports компанияси матбуот хизмати хабар берди.
Багаж бўлинмасидан олинган видео учиш залида икки томондаги юк ленталарининг тепасига ўрнатилган мониторларда кўрсатилади.
«Бу дунёнинг кўплаб аэропортларида қўлланилаётган тажриба. Багаж лентага туширилади ва ҳар бир киши ўз нарсаларига қандай муносабатда бўлаётганини кўриши мумкин», — дейди Uzbekistan Airports бошқаруви раиси Раъно Жўраева.
Унинг таъкидлашича, бу юкчиларни ҳам интизомга чақиради, чунки улар камералар орқали видео учиб келиш залида кўрсатаётгани ҳақида огоҳлантирилади.
Бундан ташқари, Uzbekistan Airports Handling ҳендлинг компанияси багажни кутиш вақти ўртача 20 дақиқадан ошмаслиги кераклигига эътибор қаратаётгани айтилди.
«Тошкент» халқаро аэропортида бундай янгилик илк маротаба амалга оширилди ва йўловчилар учун хизмат кўрсатиш сифатини яхшилашга, шунингдек, бошқарув компанияси ҳамда аэропортнинг очиқ ахборот сиёсатини шакллантиришга қаратилди, дейилади хабарда.
Қайд этиш жоизки, бугунга қадар кўплаб йўловчилар ўз жомадонлари ва улардаги буюмларга шикаст етказилганидан кўп маротаба шикоят қилган. «Газета.uz» мухбири ҳам юкчиларнинг жомадонларни ерга отиб юбораётганига гувоҳ бўлган.
