3 апрелдан 4 апрелга ўтар кечаси Лас-Вегасда жойлашган Эм-джи-эм Гранд Гарден-аренада Грэмми мусиқий премиясининг 64-тақдирлаш маросими бўлиб ўтди. Премияда 86 номинация бўйича ғолиблар аниқланди.
Бундан ташқари, премия давомида Украина президенти Владимир Зеленский иштирокчиларга видеомурожаат йўллаб, Россия билан урушда Украинани қўллаб қувватлашни сўради.
«Мусиқанинг энг кучли контрасти (қарама-қаршилиги) нима? Бузилган шаҳарлар ва ўлдирилган одамларнинг сукунати. Жимликни мусиқангиз билан тўлдиринг. Бизнинг ҳикоямизни айтиб бериш учун буни бугуноқ бошланг. Имконингиз бўлиши билан бизни қўллаб-қувватланг. Ҳар қандай кўринишда, фақат сукунат билан эмас», — деди Украина етакчиси.
Грэмми-2022 танлованинг ғолиблари рўйхатининг айримларини эътиборингизга ҳавола этамиз.
«Йил қўшиғи»
Ушбу йўналиш бўйича 10 дан ортиқ иштирокчилар орасидан, таркибида Бруно Марс ва Андерсон Пак бўлган «Silk Sonic»нинг «Leave The Door Open» (Эшикни очиқ қолдиринг) қўшиғи ғолиб деб топилди.
Продюсерлар: Dernst «D'Mile» Эмиль II & Бруно Марс, муҳандис/микшер: Сербан Генеа, Джон Хейнс и Чарльз Мониз, мастеринг: Ренди Мерилл.
Шунингдек, ушбу ижро Йил қўшиғи, R&B услубидаги энг яҳши ижро, R&B услубидаги энг яҳши қўшиқ муаллифи номинацияларини ҳам қўлга киритди.
Андерсон Пак ушбу ғалабани бир неча кун аввал вафот этган онасига бағишлади.
«Йил альбоми»
Ижрочилар, янги материал муаллифлари, продюссерлар, инженерлар, микшерлар ва мастеринглар учун мукофот.
Ушбу номинацияда Джон Батистнинг «We are» (Биз) альбоми ғолиб деб топилди. Ушбу альбом 13 та қўшиқдан ташкил топган.
«Мен ўтмишдан илҳом олишни ва келажакни яратиш мақсадида уни ҳозирги пайтда содир бўлаётган воқеалар билан бирлаштиришни яхши кўраман», — дея ўз альбомини таърифлаган ижодкор.
«Энг яхши янги ижрочи»
Америкалик 19 ёшли Оливия Родриго «Энг яхши ижрочи» номинациясга эга бўлди. Бундан ташқари Оливия Изабель Родриго Грэммининг «Энг яхши поп-альбом ижрочиси» ва «Энг яхши якка поп ижрочиси» номинациясида ҳам ғолиб бўлди. У ўзининг дебют қўшиғини 2021 йининг январь ойида чиқарганди.
«Энг яхши замонавий инструментал альбом»
Америкалик 38 ёшли жаз пианисти ва композитори Тейлор Эйгстининг «Tree Falls» (Дарахт қулайди) альбоми Энг яхши замонавий инструментал альбом деб топилди.
«Энг яхши рок-ижро»
Ушбу номинацияда 1994 йилда Вашингтон штатида ташкил этилган «Foo Fighters» рок гуруҳи ўзининг «Making A Fire» (Гулхан ёқиш) қўшиғи билан ғолиб деб топилди.
«Foo Fighters»нинг «Waiting On A War» (Урушни кутиб) қўшиғи эса «Энг яхши рок қўшиғи» деб топилди.
«Энг яхши реп-ижро»
Baby Keem ва Kendrick Lamar`нинг «Family Ties» (Оила алоқалари) қўшиғи Grammy мусиқий премиясининг энг яхши реп ижроси номинациясини қўлга киритди.
«Энг яхши таронали реп-ижро»
Энг яхши таронали реп-ижро деб топилган «Hurricane» (Бўрон) 2021 йилнинг энг кутилган альбомларидан бири — Канье Уэстнинг «Donda» альбомидан ўрин олган. 44 ёшли Канье Уэст ушбу альбомни ўз онасига бағишлаган.
«Энг яхши глобал мусиқий ижро»
Покистонлик композитор Арудж Афтаб ўзининг «Mohabbat» (Муҳаббат) қўшиғи билан энг яхши глобал мусиқий ижро номинациясини қўлга киритди.
«Менимча, мен ҳозир ҳушдан кетаман. Вау, катта раҳмат. Менимча, бу категориянинг ўзи умуман ақлбовар қилмас ҳисобланади» — деди Афтаб ўз чиқишида.
