НАТОга аъзо давлатлар пайшанба куни эрталаб РФнинг Донбассдаги ҳарбий операция бўйича қароридан сўнг шошилинч йиғилиш ўтказиш қарорини қабул қилди. Бу ҳақда Франс Пресс агентлиги хабар бермоқда.
Сал аввал НАТО раҳбари Йенс Столтенберг РФнинг Украинадаги ҳаракатларини қоралаши ҳақида баёнот билан чиққан эди.
«Мен Россиянинг Украинага асоссиз ва хоинона ҳужумини кескин қоралайман. Ҳужум кўплаб инсонларнинг ҳаётини хавф остига қўймоқда», деган НАТО раҳбари ўз баёнотида.
Столтенберг Россиянинг Украинага бостириб кириш ҳаракатини «халқаро ҳуқуқнинг жиддий бузилиши», «евроатлантика хавфсизлигига таҳдид» сифатида баҳолаган.
НАТО раҳбари Россияни зудлик билан ҳарбий ҳаракатларни тўхтатишга, Украина суверенитети ва ҳудудий яхлитлигини сақлашга чақирган.
Россия президенти Владимир Путин 24 февраль куни эрталаб миллатга телемурожаатида Донбасс ҳудудида «махсус ҳарбий операция» бошланганини эълон қилди. Путиннинг мурожаати тугаши биланоқ, Киев, Харьковь, Мариуполь, Одесса ва Украинанинг бошқа шаҳарларида портлашлар бошланди, дея хабар берди УНИАН ахборот агентлиги. Донбассдаги сепаратистлар томонидан ҳам отишмалар бошланди.
Шунингдек, 24 февралга ўтар кечаси БМТ хавфсизлик кенгаши Украина атрофидаги можароларга бағишланган йиғилишни чақирди. БМТ бош котиби ўз чиқишида Россия президенти Владимир Путинни Украинага бостириб киришни тўхтатишни, «тинчликка имкон беришини» сўраган ва тинчлик ўрнатишга чақирди.
Хабар тўлдирилмоқда.
