Россия ДХР ва ЛХР мустақиллигини тан олди. Жаҳон ҳамжамиятининг бунга муносабати:
Россия президенти Владимир Путин Донетск ва Луганск халқ республикаларининг мустақиллигини тан олиш тўғрисидаги фармонларни имзолади ва Россия Федерацияси қуролли кучларига ўз ҳудудларида «тинчликни сақлаш функцияларини амалга ошириш» бўйича кўрсатма берди. У, шунингдек, СССР парчаланишини танқид қилиб, собиқ иттифоқни тарихий Россия деб атади.
Федерация Кенгаши Путинга Россия Қуролли Кучларидан хорижда фойдаланишга рози бўлди
Федерация Кенгаши Донбасс атрофидаги вазият муносабати билан Россия Қуролли Кучларини Россия Федерацияси ҳудудидан ташқарида қўллашга рози бўлди. Бу ҳақда Инерфакс хабар берди.
Мазкур қарор қабул қилинган пайтдан эътиборан кучга киради. Россия президентининг ўзи Россия Қуролли Кучларининг мамлакатдан ташқарида бўлиш муддатини, уларнинг умумий сонини, фаолият соҳалари ва вазифаларини белгилайди. Бундай моддалар Федерация Кенгаши қарори лойиҳасида мавжуд, деди палатанинг конституциявий қонунчилик ва давлат қурилиши қўмитаси раҳбари Андрей Клишас.
Россия Давлат Думаси спикери Донбасс бўйича қарорини қўллаб-қувватламаган давлатларни огоҳлантирди
Россия Давлат Думаси раиси Вячеслав Володин Россиянинг ўзини ўзи эълон қилган Донецк ва Луганск халқ республикаларини мустақил давлат сифатида тан олиш қарорини ҳали қўллаб-қувватламаган давлатларни огоҳлантирди.
Унинг сўзларига кўра, ДХР ва ЛХР мустақиллигини аллақачон Куба, Венесуэла ва Никарагуа (шунингдек, Жанубий Осетия, Абхазия ва Сурия) томонидан тан олинган.
«Умид қиламизки, бошқа давлатлар қарорни қўллаб-қувватлайди ва ҳамма учун „яхши бўлишга“ уринмайди, чунки бундай позиция ёмон якунланади», деди у (видео).
Европа Иттифоқи ДХР ва ЛХР республикаларини тан олмасликка чақирди
Европа Иттифоқи давлатларни Донетск ва Луганск халқ республикалари мустақиллигини тан олмасликка чақирди. Бу ҳақда Европа Иттифоқи дипломатияси раҳбари Жосеп Боррелга таяниб Коммерсантъ хабар берди. Ҳужжатда Европа Иттифоқи Россиянинг қонунбузарликларига «қўшимча чоралар» билан жавоб беришга ваъда беради.
«Биз Россияни можаро тарафи сифатида тан олишдан воз кечишга, ўз мажбуриятларини бажаришга, халқаро ҳуқуқни ҳурмат қилишга ва „Норманд формати“ ва Уч томонлама алоқа гуруҳи доирасидаги музокараларга қайтишга чақирамиз. Биз бошқа давлатларни Россиянинг мустақилликни тан олиш ҳақидаги ноқонуний қарорига амал қилмасликка чақирамиз», — дейилади баёнотда.
Ҳужжатда Европа Иттифоқи «Россияни ўзини ўзи эълон қилган „республикалар“ билан имзоланган янги шартномалардан Украинага қарши кейинги ҳарбий ҳаракатлар учун баҳона сифатида фойдаланишдан огоҳлантиради ва зудлик билан кенгроқ сиёсий ва иқтисодий санкцияларни қўллашга тайёр». Баёнотда таъкидланганидек, иттифоқ Украинага сиёсий ва иқтисодий ёрдам кўрсатишда давом этади.
ДХР ва ЛХРнинг тан олиниши ортидан Россияга қарши қўлланилаётган санкциялар
Лондон ДХР ва ЛХРнинг тан олиниши туфайли Россиянинг бешта банки, Ротенберг ва Тимченкога қарши санкциялар киритди
22 февраль куни Буюк Британия биринчи бўлиб Донетск ва Луганск халқ республикалари мустақиллигини тан олгани учун Россияга қарши санкциялар қўлланилишини эълон қилди. Чекловлар қуйидагиларга таъсир қилади:
- Тадбиркорлар: Борис Ротенберг, Игор Ротенберг, Геннадий Тимченко
- Банклар (уларнинг активлари музлатилиши кутилмоқда): Россия банки, Промсвязбанк, Генбанк, Қора денгиз тараққиёт ва тикланиш банки ва Саноат жамғарма банки
Еврокомиссия Донбассдаги операцияни молиялаштиришда иштирок этган Россия банкларига қарши ЕИ санкцияларини таклиф қилди
Еврокомиссия ЕИ Кенгашига Россия ҳукуматининг ЛХР ва ДХРни тан олиш, Донбассдаги ҳарбий операцияларни молиялаштириш ва ЛХР билан савдо қилиш тўғрисидаги қарорига алоқадор деб топилган 27 нафар жисмоний ва юридик шахсга нисбатан санкцияларни тасдиқлашни таклиф қилди — Коммерсантъ.
Bloomberg маълумотларига кўра, чекловлар Россия банки, Промсвязбанк ва ВЭБ давлат корпорациясига таъсир қилиши мумкин.
Еврокомиссия раҳбари Урсула фон дер Ляйен ва Европа кенгаши президенти Шарл Мишелнинг қўшма баёнотида таъкидланганидек, санкциялар «Россия давлати ва ҳукуматининг Европа молия бозорига киришини чеклашга қаратилган». Бу аниқ қандай чекланиши айтилмаган.
Венгрия Европа Иттифоқининг Россияга қарши янги санкцияларини жорий этишни қўллаб-қувватламади
Венгрия Европа Иттифоқи мамлакатлари доимий вакиллари қўмитаси (Coreper) йиғилишида Брюссель ДХР ва ЛХРнинг тан олинишига жавобан жорий қилмоқчи бўлган Россияга қарши санкциялар пакетини қўллаб-қувватламади, дея хабар берди Интерфакс.
«Барча давлатлар Россияга қарши янги санкцияларни очиқдан-очиқ қўллаб-қувватламоқда, биргина — Венгриядан ташқари. Улар мулоқот жараёни муҳимлигини таъкидладилар», — дейилади хабарда.
Сешанба куни эрталаб Франциянинг ЕИ Кенгашидаги ваколатхонаси Coreper’нинг биринчи йиғилиши якунланганини эълон қилди, унда Евроиттифоқ элчилари Россиянинг Украинага қарши ҳаракатларига алоқадор бўлган шахсларга қарши мақсадли санкцияларни қабул қилишда қатъийликларини билдирди. Қайд этилганидек, сешанба куни ЕИ доимий вакилларининг иккинчи йиғилиши бўлиб ўтади.
Литва Россиянинг 25 та телеканалини кўрсатишни тўхтатади
Литвада Telia TV компанияси Россиянинг 25 та каналини трансляция қилиш тўхтатилади, ретрансляция шартномаси 30 апрелда тугайди. Хусусан, компания «Первого Балтийского канала», РEН ТВ, НТВ ҳамда «Мир» ва «Дом Кино» телеканалларини намойиш этишдан бош тортади — Коммерсантъ.
Жо Байден ДХР ва ЛХРга қарши санкциялар қўллашга доир фармонни имзолади
Ҳужжат билан АҚШ фуқароларига ДХР ва ЛХР иқтисодиётига ҳар қандай инвестицияларни киритиш, АҚШга тўғридан тўғри ёки билвосита республикалардан ҳар қандай товарлар ва технологияларни олиб кириш, АҚШдан ушбу давлатларга ҳар қандай товарларни экспорт қилишни тақиқланди. Бу ҳақда Оқ уй матбуот хизмати хабар берди.
Фармонга кўра, Москва томонидан республикаларнинг тан олиниши «Россиянинг Минск келишувларида белгиланган мажбуриятларига» тўғри келмайди. Шу билан бирга, Украина суверенитети, барқарорлиги ва тинчлигига таҳдид уйғотади. Шунингдек, бу ҳолат «АҚШ миллий хавфсизлиги ва ташқи сиёсатига ноодатий ҳамда фавқулодда таҳдидни ифодалайди», дейилади фармонда.
