Ёшлар ишлари агентлиги директори Алишер Саъдуллаев 2021 йилда ишга тушган халқаро имтиҳон тизимлари компенсацияси бўйича ҳисобот берди.

2021 йил 1 майдан бошлаб 5 та турдаги халқаро имтиҳон тизимларида юқори натижа қайд этган 31 ёшгача бўлган ёшларнинг имтиҳон харажатларини Ёшлар ишлари агентлиги томонидан тўлиқ компенсация қилиб бериш бошланди.

5 январь ҳолатига кўра, бу имкониятдан фойдаланиш учун 3518 нафар ёшлардан ариза келиб тушган. Шундан 2848 нафарига имтиҳон харжатлари компенсация қилиб берилган, 2 та ариза кўриб чиқиш жараёнида, 199 та янги ариза мавжуд.

"Газета.uz"да реклама

469 та ариза эса рад этилган. Бунга ушбу аризачилар мазкур тизим йўлга қўйилишидан аввал сертификатни қўлга киритганлиги ёки юқори натижа (максимал баллнинг 75 фоиздан юқорисини) қайд этмай, мурожаат қилгани сабаб бўлган.

Ёшлар ишлари агентилигинг «Газета.uz»га маълум қилишича, 4 январь ҳолатига кўра, ёшлар қуйидаги халқаро тизимлар орқали имтиҳон харажатларини қайтариб олган:

  • IELTS — 2 598 нафар (91,7%);
  • SAT — 204 нафар (7,2%);
  • GMAT — 15 нафар (0,5%);
  • TOEFL — 12 нафар (0,4%);
  • GRE — 4 нафар (0,1%).

Шунингдек, тизим ишга тушгандан бери энг кўп аризалар сентябрь ойида қабул қилинган (549 та).

Ҳудудлар кесимида олинганда, энг кўп Тошкент шаҳридаги ёшларга имтиҳон харажатлари қоплаб берилган (1380 та). Бу борада энг паст кўрсаткич эса Сирдарё (23 та), Жиззах (45 нафар) ва Сурхондарёда (46 та) қайд этилган.

4 январь ҳолатига кўра, умумий компенсациялар миқдори 5 млрд 218 млн сўмдан ошган.

Фото: Ёшлар ишлари агентлиги (4-январь ҳолатига кўра).

Маълумот учун, халқаро имтиҳонларда фақатгина қуйидаги натижаларни кўрсатган ёшларга имтиҳон харажатлари қоплаб берилади:

  • IELTS — 7 ва ундан юқори;
  • TOEFL — 95 ва ундан юқори;
  • GMAT — имтиҳон натижалари (Verbal/Quantative) бўйича 75 percentile ва ундан юқори;
  • GRE — имтиҳон натижалари (Verbal/Quantative) бўйича 75 percentile ва ундан юқори;
  • SAT — 1200 ва ундан юқори;