Жиноят ишлари бўйича Янгиҳаёт тумани судида уч кунлик чақалоғини сотишга уринган аёл устидан суд мажлиси бўлиб ўтди. Бу ҳақда «Ёшлар» телеканалининг «Янги давр» дастурида маълум қилинди.
Қайд этилишича, судланувчи аёл бундан етти йил олдин 1987 й.т. эркак билан шаръий никоҳдан ўтган ва у билан яшаб келган. Икки нафар фарзанди дунёга келгач, улар қонуний никоҳдан ўтган. Аммо оилавий можаролар сабаб аёл 2019 йилда уйдан чиқиб кетган. 2021 йилда яна ҳомиладор бўлиб қолган ва туғилажак фарзандини сотиш йўлларини қидирган.
Бош прокуратура ҳузуридаги Иқтисодий жиноятларга қарши курашиш бошқармаси ва туман ИИБ ходимлари чақалоқни 18 минг долларга сотмоқчи бўлган пайтда қўлга олишди.
Суд мажлисида айбланувчи Жиноят кодексининг 135-модда 3-қисмининг «а» банди (Одам савдоси ўн саккиз ёшга тўлмаганлиги айбдорга аён бўлган шахсга нисбатан содир этилган бўлса) билан айбдор дея топилган ва унга 5 йил озодликдан маҳрум этиш жазоси тайинланган.
Айбланувчининг турмуш ўртоғи чақалоқ унинг фарзанди бўлмагани сабаб уни олиб кетишдан бош тортган ва у болалар уйига жойлаштирилган.
Аввалроқ, қашқадарёлик фуқаро Гулистонда беш кунлик чақалоғини 5000 доллар эвазига сотаётган вақтида қўлга олингани ҳақида хабар берилган эди.
