АҚШ Мудофаа вазирлиги вакиллари октябрь ойида Ўзбекистонга ташриф чоғида АҚШнинг терроризмга қарши кураш бўйича кучларини жойлаштириш имкониятларини муҳокама қилишни режалаштирган. Бу ҳақда Politico ўзининг конгрессдаги манбаларига таяниб хабар бермоқда.
«Пентагон расмийлари шу ой Ўзбекистонга амалдаги хавфсизлик бўйича ҳамкорлик ишларини муҳокама қилиш учун ташриф буюришади. Кун тартибидаги энг муҳим масала „горизонт орти“ терроризмга қарши курашиш кучларини жойлаштириш имкониятини муҳокама қилиш бўлади. Бу АҚШ армиясининг кузатувини ва Афғонистондаги мўлжалларга зарба беришини енгиллаштиради», — дейилади хабарда.
Маълумотга кўра, АҚШ президенти Жо Байденнинг маъмурияти бир неча ойлардан буён америка томонига «келажакда минтақавий манфаатларни ҳимоя қилишда» ёрдам бериши мумкин бўлган Афғонистон билан чегарадош Ўзбекистон ва бошқа мамлакатлар билан музокаралар олиб бормоқда.
«Бундай террористлар учун потенциал хавфсиз жойда минтақага географик жиҳатдан яқин дўстга эга бўлиш тактик ва стратегик жиҳатдан муҳим», — дейди Август Пфлюгер, АҚШ Вакиллар палатаси аъзоси.
Бундан ташқари, нашрнинг ёзишича, АҚШ ўз қўшинларини Афғонистондан олиб чиққанидан кейин Ўзбекистон Америка ташқи сиёсатининг устувор йўналишларида юқорироқ ўринларга кўтарилган.
Бунга сўнгги пайтларда АҚШ конгресси ва бошқа идораларининг делегацияларининг Ўзбекистонга ташрифлари (1, 2) фаоллашгани мисол қилиб келтирилган.
Нашр иккала мамлакат ўртасидаги ўзаро муносабатларнинг бундай ривожланишида Ўзбекистоннинг АҚШдаги элчихонаси фаол ва тизимли иш олиб боргани ҳам қўл келганини таъкидлайди.
Вакиллар палатаси аъзоси Дон Бэкон «улар бизнинг офисимиз билан мулоқот қиладиган энг фаоллардан бири ва улар мен кўрган энг фаол элчихоналардан бири» дея таърифлади Ўзбекистнинг Вашингтондаги ваколатхонасини. «Ўзбекистон элчихонаси биз ишлаётган энг фаол ва профессионал элчихоналардан биридир», дейди The Humpty Dumpty Institute директори Жозеф Мерант.
Бэконнинг айтишича, у АҚШ ва Ўзбекистон ўртасидаги савдо тўсиқларни олиб ташлаш таклифини илгари суради ва ҳозирда Небраскада қишлоқ хўжалиги ва бошқа соҳалардаги ҳамкорлик бўйича Ўзбекистон делегациясини қабул қилиш бўйича иш олиб бормоқда. У, шунингдек, Небраска ва Ўзбекистоннинг шаҳарларидан бири ўртасида «биродар шаҳарлар» муносабатини ўрнатишга умид билдирган.
Август Плфюгер эса АҚШ Ўзбекистонга сув танқислиги муаммоси бўйича ёрдам бериши мумкинлигини таъкидлаган. У Ғарбий Техас ушбу муаммони ҳал қилиш бўйича тажрибага эга эканлигини айтади.
Маълумот учун, 11 сентябрь воқеаларидан сўнг, AҚШнинг махсус операцион кучлари 2001 йилдан 2005 йилга қадар Ўзбекистондаги Қарши-Хонобод базасида жойлаштирилган эди. 2021 йилнинг бошида АҚШ расмийлари томонидан ушбу базада хизмат қилган америкалик ҳарбийларни тиббий кўрикдан ўтказиш бўйича қарор қабул қилинган эди. Бунга сабаб ушбу зонанинг кимёвий қурол қолдиқлари, қайта ишланган уран ва бошқа хавфли моддалар билан заҳарланганлигига гумон борлигида эди.
