Ўзбекистон президенти Шавкат Мирзиёев 4 октябрь куни АҚШ Давлат котибининг биринчи ўринбосари Уэнди Шерман бошчилигидаги делегацияни қабул қилди, деб хабар бермоқда давлат раҳбари матбуот хизмати.

Қайд этилишича, Уэнди Шерман Шавкат Мирзиёевга АҚШ президенти Жозеф Байден, вице-президенти Камала Харрис ва Давлат котиби Энтони Блинкеннинг самимий саломи ва энг эзгу тилакларини етказди.

Шунингдек, икки мамлакат ўртасидаги Стратегик шериклик мулоқотининг жорий йил охиригача Вашингтон шаҳрида бўлиб ўтадиган биринчи йиғилишининг кун тартибини пухта тайёрлаш муҳим экани таъкидланди.

Қолаверса, томонлар сиёсат ва хавфсизлик, савдо, инвестиция ва инновациялар, қишлоқ хўжалиги, энергетика, таълим, соғлиқни сақлаш, гуманитар алмашинувлар каби устувор йўналишларда амалий ҳамкорликни кенгайтиришдан манфаатдор эканини маълум қилди.

Бундан ташқари, Афғонистонда вужудга келаётган вазият юзасидан батафсил фикр алмашилди. Ўзбекистоннинг афғон халқига кўмаклашиш ҳамда қўшни мамлакатда узоқ муддатли тинчлик ўрнатилиши ва унинг иқтисодий тикланишига хизмат қиладиган лойиҳаларни илгари суриш борасидаги саъй-ҳаракатлари юксак баҳоланди.

Аввалроқ, Уэнди Шерманнинг Ўзбекистонга ташрифи доирасида АҚШ коронавирусга қарши 5 млндан ортиқ Moderna ва Pfizer вакциналарини беғараз топширгани ҳақида маълум қилинган эди.

«Пандемияга қарши курашишда, шу жумладан амалдаги глобал дастур доирасида Ўзбекистонга вакциналар етказиб бериш масаласида кўрсатилаётган кўмак учун Америка томонига алоҳида миннатдорлик билдирилди», — дейилади хабарда.