ДХХ ҳуқуқ-тартибот идоралари тизимидаги ноқонуний ҳолатларга чек қўйганлиги ҳақида хабар берди.
Маълум қилинишича, Жиззах вилоятидаги туман прокурорларидан бири таъмирлаш ва ободонлаштириш ишлари билан шуғулланувчи ДУКнинг мансабдор шахслари ва бошқаларга нисбатан қўзғатилган жиноят иши доирасида ўтаётган қурилиш фирмаси раҳбарига қамоққа олиш эҳтиёт чорасини қўлламаслик ҳамда мазкур фирмада аниқланган камомад миқдорини камайтириб кўрсатиш эвазига ундан 2 минг доллар сўраган. Прокурор муқаддам ушбу пулдан 1200 долларни олган.
Ўтказилган тезкор тадбирда туман прокурори ўз хизмат хонасида пулнинг қолган 800 долларни олган вақтида ашёвий далиллар билан ушланди.
Бундан ташқари, Самарқанд вилоятидаги туман прокурорларидан бирининг ўринбосари маҳаллий фермер хўжалиги раҳбарига нисбатан суд томонидан тайинланган 3 йил озодликни чеклаш жазосини бошқа оғирроқ жазо турига ўзгартириш учун протест киритган. Суднинг апелляция босқичи жараёнида ҳукмни ўз кучида қолдириш эвазига эса 10 минг АҚШ доллари талаб қилган.
Туман прокурори ўринбосарининг бу ишга алоқадорлиги унинг воситачиси берган кўрсатма ҳамда ўтказилган тезкор-қидирув тадбирлари доирасида тўпланган ашёвий далиллар асосида тўлиқ тасдиғини топди.
Наманган вилоятидаги туманлардан бирининг Мажбурий ижро бюроси раҳбари маҳаллий фуқаронинг Қирғизистоннинг Жалолобод давлат университетидаги ўқишини Андижон давлат тиббиёт институтига кўчиришда Олий ва ўрта махсус таълим вазирлигидаги танишлари орқали ёрдам беришини айтган. У бунинг эвазига 700 доллар сўраган. Шунингдек, у муқаддам ушбу пулдан 300 доллар ҳамда 1 млн 50 минг сўм олган.
МИБ раҳбари сўралган пулнинг қолган қисмини беришини талаб қилиб, 200 доллар ва 1 млн 50 минг сўм олган вақтида ўтказилган тезкор тадбирда ушланди.
Шунингдек, Бухоро вилоятидаги «Қоракўл» ташқи иқтисодий фаолият божхона постининг катта инспектори хорижий тадбиркорнинг Туркманистон ҳудудидан келадиган юк вагонларини божхона тўловларини кам тўлайдиган деб кўрсатиб, кунлик омборхона тўловлари тўланмайдиган ҳолда декларация расмийлаштириб бериш эвазига, ундан 800 доллар талаб қилган.
Ўтказилган тезкор тадбирда божхоначи сўралган пулдан 400 долларни олган вақтида ушланди.
Ҳозирда мазкур шахсларга нисбатан Жиноят кодексининг тегишли моддалари билан жиноят ишлари қўзғатилиб, тергов ҳаракатлари олиб борилмоқда.
