Президентлик сайловларида Халқ демократик партиясидан номзод Мақсуда Ворисова амалдаги президент Шавкат Мирзиёев олиб бораётган сиёсат ва ундаги камчиликлар ҳақида қандай фикрда эканлиги ҳамда қайсиларини тўғирлашга ҳаракат қилиши тўғрисидаги саволга муносабат билдирди. Бу ҳақда Qalampir хабар берди.
Мақсуда Ворисованинг фикрига кўра, «амалдаги президент жуда катта инқилобий ўзгаришларни» амалга оширган.
«У инсоннинг олиб бораётган сиёсати, у инсоннинг олиб бораётган ўзгаришлари, Ўзбекистоннинг ички сиёсатини ва ташқи сиёсатини жуда катта дунё эътирофига сазовор бўлди. Лекин бу сиёсатда биз танқид қилаётган соҳа жуда тўғри қабул қилинган қарорларнинг ижроси таъминланмаслиги», — деди у.
«Ҳаммамиз гувоҳ бўлиб турибмиз, президент томонидан жуда тўғри қарорлар қабул қилиняпти. Халқ манфаати ўйланяпти, лекин биз узоқ қишлоққа борсак, мана шу қарордан аҳолининг хабарсизлиги ёки ижроия органларининг бунинг етарли даражада амалга оширмаслигига гувоҳ бўляпмиз. Демак, бизнинг асосий эътирозимиз ижро органларига», — дея қўшимча қилди президентликка номзод.
