28 август куни Тошкент вилояти Ўрта Чирчиқ туманидаги «Амфитеатр» мажмуасида Ўзбекистон мустақиллигининг 30 йиллигига бағишланган байрам тадбирини ўтказиш вақтида ички ишлар органлари ходимлари ҳамда Халқ депутатлари туман кенгаши депутати Феруза Бабашева ва халқ депутатлари Чирчиқ шаҳар кенгаши депутати Жаҳонгир Тўлаганов ўртасида зиддият юзага келди.
Вилоят ИИББ матбуот хизматининг маълум қилишича, тадбирда жамоат тартибини сақлаш ва хавфсизликни таъминлаш, байрам тадбирига келган шахсларни карантин қоидаларига амал қилган ҳолда тиббий ниқобда киришларини назорат қилиш бўйича Ўрта Чирчиқ тумани ИИБ ходимлари хизматга жалб этилган.
Хизматдаги ходимлар томонидан байрам тадбирига келган Феруза Бабашева ва Жаҳонгир Тўлаганов тиббий ниқобсиз бўлганлиги сабабли кириш йўлагида тўхтатилган ва карантин қоидаларига риоя қилган ҳолда ҳимоя ниқобини тақиб киришлари ҳақида айтилган, дейилади хабарда.
Таъкидланишича, улар ўзларини депутат деб оғзаки равишда таништирган ва карантин қоидаларига амал қилишдан бош тортиб, ходимларнинг қонуний талабларини бажармаган.
«Жараёнда Феруза Бабашева ўзининг депутат эканлигини ва дахлсизлик ҳуқуқи борлигини пеш қилиб, хизмат вазифасини бажараётган ИИБ ходимларини „Шармандалар“ деб камситган ва ушбу жараёнини тўғридан-тўғри 7 дақиқа 53 сония давомида видео тасвирга олиб онлайн тарзда „Fecebook“ ижтимоий тармоғига узатган», — дейилади ИИББ хабарида.
ИИВ ахборот хизмати раҳбари Шоҳрух Ғиёсовнинг қайд этишича, Тошкент вилояти ИИББ томонидан вазият тўлиқ ўрганилган ҳамда воқеа иштирокчиларининг ҳаракатларига ҳуқуқий баҳо бериш мақсадида тўпланган материаллар прокуратура органларига юборилган.
Қолаверса, депутатлардан жамоат тадбирларида белгиланган тартиб қоидаларга тўлиқ риоя этишларини ҳамда хизмат вазифасини олиб бораётган ички ишлар органлари ходимларига бўйсунмасликни тарғиб қилиш амалиётидан воз кечишлари сўралган.
Депутатларнинг изоҳи
Депутат Жаҳонгир Тўлагановнинг сўзларига қараганда, байрам бўлаётган амфитеатрга кириш қисмида 50 нафарга яқин ёш болалар, ота-оналар, аёллар турган бўлган. Аввалига депутатларни ички ишлар органлари ходимлари ўтказиб юборишган, уларнинг киришига ҳеч қандай қаршилик кўрсатишмаган, тиббий ниқоб тақиш ҳам сўралмаган.
Депутат Феруза Бабашева эса одамлар нима сабабдан тўпланиб тургани билан қизиққан.
«Кириб кетаётган пайтимизда болаларнинг ҳаммаси бизга қараб турганди, [ички ишлар органлари ходимлари] бизни ўтказиб юборишаяпти, лекин болаларни ўтказмаяпти. Нима учун бу болалар турибди, булар ҳам ўтсин, десам, ичкари тўлган, дейишди. Мен ташқарида-ку байрам, бемалол туриб кўриш мумкин, байрам болалар учун-ку деб айтдим. Энди мен депутат бўлиб кириб кетсамда, болалар ташқарида қолиб кетиши, бошқаларга билмадим, масалан менга ёмон таъсир қилади», — дея воқеа нимадан бошланганини сўзлаб берди у.
Феруза Бабашева уларни ўзи тартибга солиб туришини айтиб, киритиб юборган. Бир болали аёлни эса ИИБ ходимлари қўлидан ушлаб олиб, киришга рухсат бермай, ортига қайтарган. Буни кўрган депутат Жаҳонгир Тўлаганов уларнинг қилаётган иши нотўғрилигини айтган.
«Ўша ўрта ёшли аёл ҳам бировнинг келини, қизи. Қўлида бола турибди, аёлнинг қўлидан ушлаб (видеода депутат билагидан ушлаб тортганини кўрсатган), дарвозадан орқага тортиб, кўчага итариб ташлаяпти. Итариб ташлаганда ҳам қўлидан қўйвормаяпти, тортқилаб ётибди. Мен нимага ундай қилаяпсиз, нимага аёл кишига куч ишлатаяпсиз, бу сизга нима қилди, деб савол бердим. Шундан сўнг ИИБ ходими мен билан тортишиб кетди», — деган Жаҳонгир Тўлаганов.
Унинг ишонтиришича, ниқоб аслида баҳона, ниқоб тақмаган фуқарони маҳкамага олиб бориш шарт эмас, жойида баённома тузиб, маъмурий жавобгарликка тортиш мумкин.
Жаҳонгир Тўлаганов ва Феруза Бабашева. Фото: Видеодан лавҳа.
Таъкидланишича, ўша ерда бўлган «туман ИИБ бошлиғи ўринбосари четга чиқиб, телефонда гаплашиб бўлгач, депутат Жаҳонгир Тўлагановни идорага олиб бориш бўйича буйруқ берган».
«Кабинетда гаплашамиз бу билан, олиб бориб, мошинага тиқларинг буни, деди. Мен болалар билан сал нарироқ кетгандим, — дея вазиятни тушунтиришда давом этди Феруза Бабашева. — Тўхтаб, „нимага қўйиб юбормаяпсизлар, депутат бу, бизни байрамимизга мен билан келаётган одам“, десам қўйвормади. Аслида эфирни бошидан, 20 га яқин орган ходимлари 50 га яқин болаларни ушлаб тургани ҳолатидан олганимизда бу жуда қалтис вазиятдаги эфир бўлар эди».
Шундан сўнг, ИИБ ходимлари буйруқни бажариб, Жаҳонгир Тўлагановни судрай бошлашган.
«Табиийки, мен туманимизга келган меҳмон депутатнинг ёнини олдим ва ходимларнинг ноқонуний хатти-ҳаракатлари, депутатлик мақоми тўғрисида тушунтира бошладим», — деди Феруза Бабашева Facebook орқали тўғридан-тўғри эфир қилганига изоҳ берар экан.
Жаҳонгир Тўлаганов эса ички ишлар органлари ходимларидан қайси қонунни бузгани учун уни идорага олиб кетаётганига тушунтириш беришларини сўраган.
«Саволимга жавоб бера олмаяпти. Сиз ишимизни амалга оширишимизга қаршилик қилдингиз, деяпти. Агар ҳеч қандай қонунни бузмаган бир аёлни қўлидан ушлаб, унга куч ишлатсаю, мен унга қараб турсам, қанақа бўлади? Агар шу қонунбузарлик бўлса, майли мен розиман жаримага тортса ҳам», — деди у.
Депутатларнинг сўзларига кўра, видео тасвирга олиш бошлангунига қадар «анчагина можаро» бўлган. Видео олиш бошланганида эса ходимлар муомаласини ўзгартириб, ниқоб йўқлигини баҳона қилишга уринишган.
Маълумот учун, «Халқ депутатлари вилоят, туман ва шаҳар кенгаши депутатининг мақоми тўғрисида"ги қонуннинг 11-моддасига мувофиқ, депутат ўзининг ваколатлари муддати мобайнида дахлсизлик ҳуқуқига эга. Тегишли Халқ депутатлари кенгашининг розилигисиз депутат мазкур ҳудудда жиноий жавобгарликка тортилиши, ушлаб турилиши, қамоққа олиниши ёки суд тартибида бериладиган маъмурий жазога тортилиши мумкин эмас.
