Навоийнинг Кимёгарлар кўчасида жойлашган газ қуйиш шохобчаси ҳудудида юк автомобилининг газ баллони портлаши натижасида тўрт киши жароҳатланди, дея хабар қилди ФВВ матбуот хизмати.
Ушбу ҳолат бўйича ёнғин жойига 9 та ёнғин-қутқарув экипажи жалб этилган. Биринчи ёнғин-қутқарув экипажи соат 19:18да воқеа жойига етиб бориб, соат 19:45 да ёнғин қуршаб олинган ва соат 19:53 да ёнғин батамом ўчирилган.
ФВВ маълумотларига кўра, ёнғин келиб чиқиш сабаби «ЗИЛ-130» русумли «пропан» ёқилғи ташиш автомобили ўзидаги суюлтирилган газни тўкиш вақтида чақнаш содир бўлган, натижада юк автомобилига фойдаланиш учун ўрнатилган газ балони ёрилиши оқибатида, ёнғин келиб чиққан. «ЗИЛ-130» русумли суюлтирилган ёқилғи ташиш автомобилига ўрнатилган сиғимга зарар етмаган.
Ҳодиса оқибатида шохобча яқинидан харакатланиб кетаётган «Москвич-412» русумли автомашина ҳайдовчиси ва 3 нафар йўловчиси турли даражада куйиш тан жароҳатини олган, ҳалок бўлганлар йўқ.
Navoiy Kanal Telegram-канали маълумотларига кўра, улар орасида С. И. (1995 йилда туғилган) кучли жароҳатланган бўлиб, танасининг 94−95 фоизи куйган.
