Коррупцияга қарши курашиш агентлиги директори Акмал Бурхонов «Ular» лойиҳасига берган интервьюсида агентликка нисбатан босим ёки аралашувлар бўлиши ҳақидаги саволга жавоб берди.

«Босим ва аралашувлар бўлмаган. Лекин қўнғироқ қилиб „сизлар шу масалани кўтарибсизлар, лекин бунинг сабаблари бор“, дейишган. Биз қонунчилик доирасида қилганмиз ва бу нарсалар тўхтатиб қўйилмаган», — дейди у.

Акмал Бурхоновнинг таъкидлашича, агентлик фаолиятини тўлақонли амалга ошириш учун тўсиқлар бўлган ҳолатлар бўлади.

«Яъни бирор идорага хат ёки мурожаатни чиқарсак унга вақтида жавоб берилмайди, ёки бўлмаса у ёки бу идорага „коррупцион омиллар бор“, дея тақдимнома киритилса, раҳбарлар „бу коррупцион омил эмас“, дейишади. Тақдимномамизга бошқача муносабатда бўлишади», — дея қўшимча қилади у.

Антикоррупция агентлиги раҳбарининг маълум қилишича, коррупцияга қарши курашиш бўйича 2021−2022 йилларга мўлжалланган давлат дастурида агентликнинг қонуний фаолиятига у ёки бу даражада тўсқинлик қилиш учун жавобгарлик белгилаш масаласи бор.

«Агар бизнинг тақдимномамизга адекват реакция билдирилмаса, жавобгарликка тортиш бўйича таклиф киритганмиз. Лекин бу каби ҳолатлар бугунги кунда бор. Айрим идора ва вазирликлар ҳали ҳам агентликни тан олгиси келмайди. Агар биз қандайдир коррупцион омилларни кўтарсак „йўқ, бу унақа эмас“, дейдиган идоралар бор. Буни тан олиш керак. Лекин энг асосийси: босим йўқ», — дейди Акмал Бурхонов.

Унинг қўшимча қилишича, агар Коррупцияга қарши курашиш агентлиги қайсидир идоранинг бўйсунувида бўлганида, уларга нисбатан босим бўлса, агентлик бажаришга мажбур бўларди.

«Биз ҳозир фақат президентга бўйсунамиз ва парламент олдида ҳисобдормиз. Шунинг учун бу борада босим бўлмаган», — дейди у.