Тошкент Ички ишлар бош бошқармаси собиқ эстрада хонандаси Жаҳонгир Отажонов ишини судга тақдим этди, дея хабар қилди пойтахт ИИББ матбуот хизмати.
Июнь ойи охирида собиқ хонанда ўз видеомурожаатида давлат хизматчилари, жумладан, ИИББ ва ИИВ ходимлари шаънига ҳақоратомуз сўзларни ишлатган эди. Ҳуқуқни муҳофаза қилиш органлари унинг «ходимларнинг шаъни ва қадр-қимматини беодоблик билан қасддан тахқирлаган"ини аниқлади.
«Терговга қадар текширув жараёнида, у юқоридаги видеомурожаатида айтиб ўтган ҳақоратли гапларни жаҳл устида айтганлигини, Республика ҳукумати ва ички ишлар органлари ходимларига нисбатан ҳеч қандай шахсий адовати йўқлигини таъкидлаб, қилган ишидан пушаймонлигини билдирган», — дейилади хабарда.
Жаҳонгир Отажоновнинг қилмишида МЖтКнинг 41-моддаси («Ҳақорат қилиш»)да кўрсатилган ҳуқуқбузарлик аломатлари мавжудлиги сабабли тўпланган ҳужжатлар 23 июль куни жиноят ишлари бўйича Шайхонтоҳур тумани судига тақдим этилди.
Эслатиб ўтамиз, ўз хонандалик фаолиятини якунлаганини ва президентлик сайловида қатнашиш режаси борлигини маълум қилган Жаҳонгир Отажонов 11 июль куни онаси норози бўлгани сабабли сиёсатдан кетишини эълон қилди. У жорий йил охирида концерт беришни режалаштираётганини айтиб ўтди.
