Қашқадарё вилоятининг Яккабоғ туман ҳокимлигида ҳокимликка қарашли бино йўқ эканлиги, ҳокимлик ҳозирга қадар партия балансидаги бинода ишлаб келаётгани маълум бўлди. Бу ҳақда Daryo туман ҳокими Лутфиддин Абдуллаевнинг сўзларига таяниб хабар бермоқда.
Маълумотга кўра, туман ҳокими 2021 йилнинг 18 июль куни Яккабоғ туман ҳокимлиги вилоятда фаолият юритувчи журналист ва блогерлар учун пресс-тур ташкил этиб, ОАВ вакилларини қизиқтирган саволларга жавоб берган.
Лутфиддин Абдуллаев туман ҳокимлиги биноси ҳокимликка қарашли эмаслигини, ҳокимлик партия балансидаги бинода фаолият юритиб келаётганини айтган.
«Бундан бош вазир ўринбосарларининг, молия вазирининг ҳам хабари бор. Иқтисодиёт ва молия бўйича шуғулланувчи Жамшид Қўчқоров ҳокимлик биноси учун маблағ ажратилишини, тез орада бино қурилишини айтган. Бу муаммо яқинда ҳал бўлади», — деди туман ҳокими Лутфиддин Абдуллаев.
Туман ҳокимининг аниқлик киритишича, ҳокимлик фаолият юритувчи бино Халқ демократик партиясининг туман бўлими балансида туради.
