Британиялик миллиардер, Virgin Galactic компанияси асосчиси Ричард Брэнсон 11 июль куни VSS Unity суборбитал ракетопланида коинотга парвозини муваффақиятли амалга ошириб, космик туризм эрасини бошлаб берди. Парвоз тўғридан-тўғри эфирга узатилди.
Фото: Virgin Galactic.
70 ёшли тадбиркор билан Unity 22 миссиясида (кеманинг синов парвози тартиб рақами) икки нафар учувчи — Дэйв Маккей ва Майкл Масуччи ҳамда Virgin Galactic бош астронавт-инструктори Бет Мозес, бош амалиётчи муҳандис Колин Беннетт ҳамда ҳукумат билан алоқалар бўйича вице-президент, асл келиб чиқиши ҳиндистонлик бўлган авиацион муҳандис Сириша Бандла ҳам бор эди.
Кеманинг ажралиш жараёни. Трансляциядан лавҳа.
Ричард Брэнсоннинг онаси Ева (январда 96 ёшида коронавирусдан вафот этди) шарафига Virgin MotherShip Eve деб номланган ташувчи самолёт эрталаб Нью-Мексико штатидаги (АҚШ) «Америка» космопортидан парвоз қилди. Парвознинг 45-дақиқасида самолёт 15 км баландликка кўтарилганидан кейин VSS Unity ундан ажралди ва 60 сония ичида 88 км баландликка кўтарилди.
Фото: Virgin Galactic.
Йўловчилар бир неча дақиқа давомида вазнсизлик ҳолатида бўлганларидан сўнг, кема планёр режимида пастлашишни бошлади. Тушиш бир неча дақиқа давом этди ва парвоздан қўнишгача бўлган жами парвоз 59 дақиқа давом этди.
Фото: Virgin Galactic.
Бу тўлиқ таркибдаги экипаж билан амалга оширилган биринчи синов парвози бўлди. The Guardian нашрининг ёзишича, тижорий парвозлар йўлга қўйилгунга қадар 2022 йилда компания яна иккита синов парвозини амалга оширади. Virgin Galactic маълумотларига кўра, коинот чегарасига (НАСАга кўра денгиз сатҳидан 80 км, халқаро миқёсда эса 100 км баландлик деб тан олинган) парвоз қилишни кутаётганлар сони 600 кишини ташкил этиб, улар битта парвоз учун 250 минг доллар тўлашга тайёр.
Кеманинг қўниш жараёни. Трансляциядан лавҳа.
«Юқоридан ерга қарашда ҳис қиладиган туйғуларни сўз билан таърифлаб беришнинг иложи йўқ, бу шунчаки таърифлаб бўлмайдиган гўзаллик», — деди Ричард Бренсон қўнганидан кейин. «Агар сиз қачонлардир орзу қилган бўлсангиз, уни амалга ошириш вақти келди. Янги космик эра тонгига хуш келибсиз», — деди у.
Ричард Брансон Virgin Galactic компаниясига 2004 йилда асос солган. У коинотга туристик парвозни амалга оширишни мақсад қилган бошқа бир миллиардер — Amazon интернет-гиганти ва Blue Origin аэрокосмик компанияси асосчиси Жефф Безосни тўққиз кунга ортда қолдирди.
20 июль — америкалик астронавтнинг Ойга қўйганига 52 йил тўлган куни Жефф Безос укаси Марк ва яна икки йўловчи (улардан бири 82 ёшли учувчи аёл Уолли Фанк) New Shepard кўп марталик суборбитал ракетасида 105 км баландликка кўтарилиши керак. Кема коинотга кўтарилган биринчи америкалик астронавт Алан Шепард шарафига номланган.
Илон Маск томонидан асос солинган SpaceX компанияси эса сентябрда Crew Dragon кўп марталик кемасида тўрт кишилик экпипаж билан Inspiration4 биринчи тўлиқ фуқаролик миссиясини юборишни режалаштирмоқда. Брэнсон ва Безос миссияларидан фарқли равишда, бу уч кун давом этадиган орбитал парвоз бўлади.
