Коррупцияга қарши курашиш агентлиги раҳбари Акмал Бурхонов Kun.uz нашрига берган интервьюсида коррупцияга қарши курашга баҳо берди.
«10−11 ой давомида ҳукумат томонидан, давлат раҳбари бошчилигида давлат идоралари томонидан амалга оширилган ишларни, саъй-ҳаракатларини 10 баллик тизимда баҳолаш керак бўлса, қўрқмасдан 8 балл берган бўлардим. Ҳаракатларимизни агар таҳлил қиладиган бўлсак бемалол шундай десак бўлади», — дейди у.
Акмал Бурхонов президент селектор йиғилишларида, у ёки бу тадбирда қатнашганида, албатта, энг камида 10 та йиғилишда коррупция масаласига тўхтатилишини таъкидлади.
«Қурилиш соҳасими, таълим соҳасими, давлат хизматими ёки хизмат кўрсатиш соҳаси бўладими, албатта, ўша жойдаги коррупцияни олдини олиш кераклигига алоҳида урғу берилади. Қабул қилинаётган қарор, фармонлар эътибор қилаётган бўлсак қонун ҳужжатининг таъсир этишини баҳолашда коррупциявий хавф-хатарлар инобатга олинади», — деб айтиб ўтди Коррупцияга қарши курашиш агентлиги раҳбари.
Акмал Бурхоновнинг сўзларига кўра, агентликнинг энг катта ютуғи — очиқлик сиёсати. «Иккинчиси, ўтган йилда қабул қилинган иккита муҳим ҳужжат: биринчиси давлат бюджетининг очиқ бўлишига қаратилган [ҳужжат]. Энди давлат идоралари 2021 йилдан бошлаб ўзларининг давлат бюджетидан олган ҳар бир суммасини жамоатчиликка очиқ эълон қилиши шарт. Иккинчиси эса, давлат харидларини тўғри тартибга солувчи давлат харидлари тўғрисидаги қонуннинг янги таҳрирда қабул қилинганлиги. Бу бўйича ҳам катта ўзгаришлар бўлди», — дея қўшимча қилади у.
Бурхонов давлат хизматида, лицензия, рухсатномалар берилишида инсон омилининг камайтирилиши ҳақида айтиб ўтди. Унинг сўзларига кўра, 1 январдан бошлаб ўттиздан ортиқ лицензиялар тамомила бекор қилинган, элликдан ортиқ турли хил рухсат берувчи тартиб-таомиллар соддалаштирилган. «Бу ҳам коррупциянинг олдини олишга қўйилган катта қадамлардан, деб айтса бўлади», — дейди агентлик раҳбари.
Акмал Бурхонов «Газета.uz»га берган интервьюсида коррупция даражаси мамлакат тараққиёти ва демократиясининг кўрсаткичи ҳисобланишини таъкидлаган эди.
