3 май куни соғлиқни сақлаш вазири ўринбосари, Санитария-эпидемиологик осойишталик ва жамоат саломатлиги хизмати бошлиғи Баҳодир Қаҳрамонович Юсупалиев коронавирус инфекциясига қарши ZF-UZ-VAC2001 вакцинаси билан эмланди.
«Юқумли касалликлар бўйича энг самарали профилактика бу — вакцинация, аҳолини оммавий эмлаш ҳисобланади», — дея қайд этди Баҳодир Юсупалиев.
«Мана бугун мен ҳам коронавирусга қарши вакцина билан эмландим. Бу билан ўзим, оила аъзоларимнинг саломатлигини ҳимоя қилишим мумкин», — деди у.
Вазир ўринбосари СOVID-19 вакцинаси пандемиядан чиқишнинг ягона йўли эканлигини таъкидлади.
Ўзбекистонда аҳолини коронавирусга қарши эмлаш жараёни 1 апрель куни бошланган эди. Шу вақтга қадар 865 мингдан зиёд киши вакцина олди.
Мамлакатда расман тасдиқланган COVID-19 ҳолатлари сони 2 май куни ҳолатига кўра 92 мингдан ошди (кунлик ўсиш — 363 та).
