Қирғизистон Миллий хавфсизлик давлат қўмитаси раиси Қамчибек Ташиев Кампир-Обод сув омбори яқинидаги 50 гектар ерни Ўзбекистонга берилишига қарши бўлган Ўш вилояти Қора-Сув тумани аҳолиси билан учрашди, деб хабар берди Kaktus.media.
Портал Ўзбекистон билан тузилган шартномага биноан бир қатор чегара участкалари, шу жумладан Унгар-Тоғ тоғи Қирғизистонга ўтказилишини эслатиб ўтди. Ушбу ҳудудлар эвазига Ўзбекистон Кампир-Обод сув омборидан фойдаланиш ҳуқуқини олди. Шахрихонсой канали жойлашган 50 гектар майдон ҳам Ўзбекистонга ўтди. Бунинг учун Қирғизистон Ўзган вилоятининг 50 гектар чегара зонасини олди. «Газета.uz» бундан олдин ҳам бу ҳақда Қирғизистон ОАВ ва Қамчибек Ташиевга асосланиб ёзган эди. Ўзбекистон томони Қирғизистон билан тузилган шартномалар натижалари тўғрисида расмий равишда хабар бермаган.
Айни пайтда, 14 апрель куни Қирғизистоннинг Қора-Сув вилояти Савай қишлоғи аҳолиси Кампир-Обод сув омбори яқинидаги 50 гектар майдонни ўзбек томонига беришига қарши муддатсиз акцияни бошлашди. Оқсоқоллар расмийларнинг ҳаракатларидан, ер участкалари алмашинуви тўғрисида тушунарли маълумотларнинг йўқлигидан ва маҳаллий аҳоли фикри инобатга олинмаганидан норози эканликларини маълум қилдилар. Аҳолининг фикрига кўра, алмашиниш Қирғизистон манфаатларига зарар етказган ҳолда амалга оширилган.
Воқеа жойига келган Қамчибек Ташиев намойишчиларга ер алмашинуви шартларини қуйидагича тушунтирди:
«Ушбу протокол бизнинг халқимиз учун энг манфаатли ва фойдалидир. Бундай ҳолда, низо фақат 50 гектарни ташкил қилади. Бу ҳудудни бермаслик мумкин эди, деган фикрлар эшитилмоқда. Аммо бизда бу қарорнинг сабаби бўлган. Бошқа туманлар, баҳсли ҳудудлар аҳолисининг муаммоларини ҳал қилиш керак эди», — деди Миллий хавфсизлик давлат қўмитаси раҳбари.
Бироқ, Қора-Сув вилояти аҳолиси ўз фикрларида қолишди. Улар Қирғизистон 50 гектар ер ҳудудини Ўзбекистонга бермаслиги керак деб ҳисоблашади. Шу сабабли, музокаралар якунида Қамчибек Ташиев ўзбек томони билан келишув шартларини ўзгартириш тўғрисида гаплашишини маълум қилди:
«Мен уларга 50 гектар эмас, балки фақат 20 гектар майдонни алмаштиришни таклиф қилишга ҳаракат қиламан. Бунинг учун мен Тошкентга бориб, музокаралар олиб боришим керак. Ушбу 20 гектар ўрнига биз бошқа ҳудудда, эҳтимол Ўзган тумани яқинида ҳудудни оламиз. Мен ҳаракат қиламан, майлими? Қолганини Худо кўрсатади».
Журналистлар Тошкент бунга рози бўладими, агар жавоб салбий бўлса, нима бўлишига ойдинлик киритиш мақсадида мурожаат қилишди. Қамчибек Ташиев ўзбек ҳамкасблари бунга рози бўлиши ҳақида айтди, деб ёзади Kaktus.media.
