Туркияда Рамазон ойи пайтида карантин чекловлари кучайтирилади
Туркия президенти Режеп Таййип Эрдоған мамлакатда дам олиш кунлари, шунингдек, Рамазон ойида қатъий чеклов чоралари қайта жорий этилишини эълон қилди. «Миллий комендантлик соати маҳаллий вақт билан соат 21:00 дан 05:00 гача давом этади», — деди Эрдоған. Кафе ва ресторанларнинг бандлиги 50 фоиздан ошмаслиги керак. Бундан ташқари, Рамазон ойида (13 апрель — 13 май) жамоат овқатланиш жойларида тонг ва шом пайтида жамоа бўлиб саҳарлик ва ифторлик қилиш тақиқланади — кафелар ва ресторанлар олиб чиқиш ёки етказиб бериш хизматларни таклиф этиши мумкин. Aйни пайтда мамлакатнинг 81 провинциясидан 58тасида эпидемиологик вазият ўта ёмон деб баҳоланмоқда. — Интерфакс.
Беларусда экстремизм билан боғлиқ 700 дан ортиқ иш судга юборилди
Беларусь Тергов қўмитаси (ТҚ) прокуратура органларига экстремизм билан боғлиқ 700 дан ортиқ жиноий ишларни судларга юбориш учун топширди. «Aйни пайтда ТҚ тергов ўтказиб, экстремизм билан боғлиқ 700 дан ортиқ жиноий ишларни судга юбориш учун прокуратура органларига топширган. Тартибсизликлар ва бошқа ноқонуний хатти-ҳаракатларда иштирок этган барча шахсларни, айниқса, уларнинг ташкилотчилари ва координаторларини аниқлаш бўйича фаол чоралар кўрилмоқда», — деди ТҚ вакили Алексей Бородько. Унга кўра, ўтган йили 350 дан ортиқ шахс жиноий жавобгарликка тортилган, уларнинг учдан икки қисми ўз айбларини тўлиқ ёки қисман тан олган. Aйбланувчининг ўртача ёши 25 дан 33 ёшгача бўлган, уларнинг деярли ярми ҳеч қаерда ишламаган ёки ўқимаган. — БелТА.
Руминияда карантин чораларига қарши намойишлар учинчи кун давом этмоқда
Руминияда коронавирус тарқалиши билан боғлиқ чеклов чораларининг кучайтирилишига қарши норозиликлар учинчи кун давом этмоқда. 30 март куни кечқурун намойишчилар Бухарестдаги Университет майдонига йиғилиб, марш ўтказдилар, улар ички ишлар ва соғлиқни сақлаш вазирликларида, Ғалаба майдонидаги ҳукумат қароргоҳи ва давлат раҳбарининг қароргоҳи ёнида кезишди. ОАВнинг хабарларига кўра, намойишларда 2 мингга яқин киши қатнашган ва уларнинг аксарияти тиббий ниқобсиз эди. Улар миллий байроқларни кўтариб, ҳукуматга қарши шиорлар айтиб қичқиришган, шунингдек, бош вазир Флорин Кицу ва ички ишлар вазири Раед Aрафатнинг истеъфосини талаб қилишган. Руминияда давом этаётган норозилик намойишлари маълум сиёсий кучлар томонидан уюштирилганлиги ҳақидаги назариялар тобора кенг тарқалмоқда, дея ёзмоқда ТАСС. Руминия ҳукумати 28 март кунидан бошлаб коронавирус тарқалишига қарши чеклов чораларини кучайтирди. Хусусан, дам олиш кунлари соат 22:00 ўрнига 20:00 дан бошлаб комендантлик соати жорий этилди ва дўконларнинг иш вақти қисқартирилди. Ушбу чораларга қарши норозилик намойишлари Руминиянинг бошқа бир қатор шаҳарларида ҳам бўлиб ўтди. — ТАСС.
AҚШ хорижлик мутахассислар учун визаларни қайта расмийлаштиришни режалаштирмоқда
AҚШ президенти Жо Байден маъмурияти чет эллик мутахассислар учун бир қатор ишчи визаларини беришга қўйилган тақиқни бекор қилишни режалаштирмоқда. Унга кўра, AҚШнинг янги расмийлари ўтган йили бир неча тоифадаги ишчи визаларини, шу жумладан H-1B, H-2B, H-4, L турлари ва кўплаб J тоифадаги ҳужжатларни беришга қўйилган тақиқни узайтирмаслик имкониятини кўриб чиқишмоқда. Уларнинг барчаси AҚШда ишлаш ҳуқуқини беради. Ўша пайтдаги президент Дональд Трамп томонидан январь ойи бошида узайтирилган тақиқ 31 мартда ўз кучини йўқотади. Хусусн, H-1B дастури AҚШ иш берувчиларига чет эллик ишчиларни вақтинча жалб этиш имкониятини беради. Мамлакатнинг йирик технологик компаниялари ўз соҳаларини, айниқса илмий ва техник соҳаларни чуқур биладиган чет эллик мутахассисларни жалб қилиш учун ушбу виза турига қўйилган тақиқни бекор қилиш бўйича мурожаат қилишди. — Bloomberg.
АҚШда бир неча турдаги визалар мавжуд. Уларнинг H,L,O,P,Q,R тоифалари ишчи виза турига киради.
