Ички ишлар вазирлиги 28 март, якшанба куни Тошкент марказида бўлиб ўтган тартибсизликлар бўйича расмий муносабати баён этилган видеони эълон қилди.

Эслатиб ўтамиз, Aмир Темур майдони ёнида 12 нафар намойишчи ҳибсга олинган. Улар ЛГБТ фаоллари деб ҳисоблаган ёшларга қарши чиқишган. Намойишчиларга нисбатан «безорилик» моддаси билан жиноят иш қўзғатилган.

«Охирги кунларда Бозоров Миразиз исмли фуқаро ўзининг ижтимоий тармоқларида Тошкент шаҳридаги „Ҳазрати Имом“ масжиди олдида ва Aмир Темур хиёбонида ноанъанавий жинсий қарашларга эга шахслар томонидан оммавий намойишлар ўтказиш бўйича чақириқ билан чиққан. Таъкидлаш керакки, Бозоров бундан аввал ҳам бир неча бор жамиятда юриш-туриш қоидаларини қасддан менсимасдан, шахснинг қадр-қимматини камситувчи, миллатимизга хос бўлмаган хурмача қилиқлари акс этган видео лавҳаларини ижтимоий тармоқлар орқали тарқатиб, ўзининг бузуқ хулқ-атворини оммага намойиш қилиб келган», — дейилади ИИВ тақдим этган видеода.

«Натижада, 28 март куни унинг номақбул чақириқларини ўзларига нисбатан ҳақорат деб ҳисоблаган бир гуруҳ фуқароларимиз бу ҳолат юзасидан ўз фикр ва қарашларини билдириш мақсадида Тошкент шаҳридаги Aмир Темур хиёбонига тўпланишди. Бунинг оқибатида мазкур шахслар томонидан оммавий тартибсизлик содир этилиб, жамоат хавфсизлигига путур етказилган. Ўз навбатида ҳуқуқ-тартибот органлари томонидан мазкур тартибсизлик кескин бартараф этилиб, ҳуқуқбузарлик келтириб чиқарган шахслар қўлга олинган», — деб айтилди баёнотда.

Ушбу видеода бир неча юзлари яширинган киши нутқ сўзламоқда. Уларнинг сўзларига кўра, улар рухсатсиз намойишларнинг иштирокчилари бўлишган.

«Бу одамнинг гапларига эътибор берманглар. Бунақа фитналарга учиш керакмас экан. Мана биз алдандик, кўрдик кимлигини. Aқл билан иш қилиш керак экан», — дейди фуқаролардан бири.

«Бу маълумот ишончли эмас экан. Ким нима деса кетавермаслик керак. Ҳамма нарсани қайта текшириш керак экан», — дея таъкидлади яна бир фуқаро.

«Ички ишлар ходимлари ҳам айтишяпти бу нарсани. Ўзимизга яраша тушундик. Шунга қараб хулоса қиламиз», — деди акция иштирокчиларидан бири.

«Бизга бу ерда ҳамма нарсани тушунтиришди. Кўп нарсаларнни билмас эканмиз. Биринчи ўринда қонунни билмас эканмиз. Озгина тезлик, ёшлик қилиб қўйдик», — дея тан олди қўлга олинган фуқаролардан бири.
«Бу тартибсизликнинг олди олинганидан, халқ тинчлигидан хурсандмиз. Ҳуқуқ-тартибот ходимлари вазиятни тинчлантиришда ўз вазифаларни бажаришди. Ҳар қандай ҳолатда ҳам қонуний ҳаракат қилиш керак экан, деган хулосага келдим».

«Болаларга айтаманми, „бу ерга кел гаплашамиз“, „яна нимадир қиламиз“, „келинглар гаплашамиз“, деган фитна гап бўлса, шошқалоқлик қилиш керакмас экан. Иложи бўлса эгаларига, орган ходимларига топшириш керак ишни».

«Мана шундай йиғилиш қилмоқчи бўлганларга айтаман, биринчи ўринда манга ўхшаб қонуний тарафини ўрганмасдан борманглар. Бесоқолбозликка жиноий жавобгарлик бор экан. Яна бир нарсани айтмоқчиман, бундай жойларга умуман борманглар. Буни бошимдан ўтказдим: фақат хабар тарқатади-ю, лекин ўзлари келмайди».

«Қилган хатти-ҳаракатимиз нотўғри экан. Бесоқолбозликка давлат томонидан чоралар бор экан. Ижтимоий тармоқларда турли хабарлар келса, уларнинг фитнасига учиб ўтирманглар».

Шунингдек, ИИВ видеосида:

«Таъкидлаш лозимки, Бозоров илгари ҳам ўзига нисбатан ижтимоий тармоқларда билдирилган эътирозларга жавобан, ўзини жабрдийда қилиб кўрсатиб, Ўзбекистон ноанъанавий қарашларга эга шахсларга нисбатан гўёки босим ўтказилаётганилигига хорижий давлатларнинг вакиллари ва халқаро ташкилотларнинг эътиборини қаратишга уриниб келган. Бузғунчи ташқи кучлар ва ғараз ниятдаги турли халқаро ноҳукумат ташкилотлар кўмаги ва қўллови остида ҳаракат қилаётган ушбу шахс бесоқолбозлик ва шу каби салбий иллатларнинг Ўзбекистон қонунчилигида таъқиқланган бўлишига қарамасдан, уни оммавий тарғиб қилишга ҳаракат қилган ва фуқароларда норозилик, тоқатсизлик кайфияти шаклланишига сабаб бўлган», — дейилади.

Ички ишлар вазирлигининг таъкидлашича, «ушбу ҳаракатлар ҳуқуқий билими саёз ва ҳиссиёт ортидан қувишга мойил фуқароларимиз томонидан қонунга зид ҳаракатларни содир этиб, ўзбошимчалик ва тартибсизлик содир этишларига замин яратган».

Видеода яна юзлари яширинган фуқароларнинг сўзлари кўрсатилди.

«Aралашиш керак эмас. Уларга чора кўрадиган инсонлар бор, ўзларига қўйиб берайлик».

«Укам бу ерда кимларнингдир гапига учиб, керак бўлмаган ишни қилган. Ота-оналарни, ёшларни огоҳликка чақираман. Йўқ нарсаларнинг ортидан юрманглар. Ҳар хил манба, маълумотларга учманглар. Бу нотўғри. Бунга масъул шахслар бор. Огоҳ бўлишингизни сўрайман!»

«Ота-оналар сал қаттиқроқ бўлиши керак. Болаларига қаттиқ бўлмаганлиги учун шундай бўлмоқда. Ўзининг ахмоқлиги ўзининг бошига».

«Ёшларга маслаҳатим бўлар-бўлмас провокацияларга илинаверманглар. Турли ижтимоий тармоқларда одамни чалғитиб, ҳаёт тарзидан четга олиб, керакмас йўлларга солишмоқда. Катталарга маслаҳатим ёшларни йўлга солинглар».

«Ҳар бир хабарни тагига етиб кейин шунга қараб иш қилишни маслаҳат бераман. Бу жуда ҳам афсусланарли, ёмон натижаларга олиб келиши мумкин экан».

Ҳозирда тартибсизлик юзасидан Жиноят кодексининг тегишли моддалари билан жиноят иши қўзғатилиб, тергов ҳаракатлари олиб борилмоқда. Душанба, 29 март куни пойтахт ИИББ ўтган тунда бир гуруҳ номаълум шахслар томонидан Миразиз Бозоров калтаклангани ҳақида хабар қилган эди.

Қайд этиш жоизки, Ўзбекистон Маъмурий жавобгарлик тўғрисидаги кодексида рухсатсиз оммавий тадбирлар тўғрисида бир қатор моддалар мавжуд: 200−1-модда (оммавий тадбирларни ўтказиш қоидаларини бузиш), 201-модда (йиғилишлар, митинглар, кўча кортежларини ташкил этиш, ўтказиш тартибини бузиш ёки намойишлар), 202-модда (рухсатсиз йиғилишлар, митинглар, кўча кортежлари ва намойишларини ўтказиш учун шароит яратиш).