Кадастр ходими МЧЖларнинг бирининг раҳбарияти таклиф қилган порадан вос кечди ва бунинг эвазига мукофотланди. Бу Бош прокуратура ҳузуридаги департаментнинг Зангиота туман бўлими томонидан ўтказилган тезкор тадбирда аниқланган.
«Э» номли МЧЖ раҳбари ўринбосари жамиятга тегишли иссиқхона қурилиши учун ажратилган ер майдонининг топографик фотосуратини тасдиқлаш эвазига Кадастр агентлигининг Зангиота туман филиали бўлими бошлиғига 1000 АҚШ доллари таклиф қилган. У пулларни берган вақтида ашёвий далиллар билан ушлангани айтилмоқда.
Кадастр бўлими бошлиғи ўзига нисбатан пора таклиф қилинаётганлиги тўғрисида ҳуқуқни муҳофаза қилувчи органларга ўз вақтида хабар берганлиги ва фуқаронинг ноқонуний хатти-ҳаракатларини фош этишда фаол иштирок этганлиги учун мукофотланди, дейилади хабарда.
Ходимга Кадастр агентлиги раҳбарияти томонидан 10 млн сўм пул мукофоти ва Хонобод сиҳатгоҳига 2 кишилик йўлланма тақдим этилган.
Эслатиб ўтамиз, 2020 йилнинг августида Бош прокуратура коррупция ҳақида хабар қилганларга бир марталик пул мукофоти берилишини кўзда тутувчи қарор лойиҳасини жамоатчилик муҳокамаси учун эълон қилган эди. Унда пул мукофоти миқдори пора, етказилган зарар миқдори ёки ўғирланган мулк қийматига боғлиқ ҳолда — БҲМнинг 3 бараваридан сумманинг 10−15 фоизигача берилиши қайд этилганди.
