1 апрелдан 1 октябргача цемент маҳсулотини (TIF TN 2523 коди) Ўзбекистонга олиб киришда божхона божининг ноль ставкаси қўлланилади. Бу ҳақда президентнинг «Бозор тамойилларига асосланган ипотека кредитларини ажратиш орқали аҳолини уй-жой билан таъминлашга оид қўшимча чора-тадбирлар тўғрисида"ги фармонида белгиланган.
Бу мамлакатда қурилаётган уй-жойлар нархини арзонлаштириш мақсадида амалга оширилади. Ҳозирда бож ставкаси божхона қийматининг 30 фоизини ташкил этмоқда.
11 март куни Марказий банк томонидан эълон қилинган шарҳга кўра, яқин ойларда қурилиш соҳасидаги ўсиш ўтган йилгига нисбатан ошиши кутилаётмоқда. Бу эса цемент ва бошқа қурилиш материаллари нархининг ошишига олиб келади.
2020 йилнинг апрелида, мамлакатдаги карантин чекловлари вақтида ҳукумат нархлар ошиб кетиши борасидаги огоҳлантиришларга қарамай, цемент импортини чеклаган эди. Натижада цемент маҳсулотлари ўртача 25 фоизга қимматлашган ва ушбу тақиқ орадан бир ой ўтгач олиб ташланганди.
Июль ойида цемент олиб кириш жараёнини соддалаштириб, уни эркин муомалага олдингидек 28 кун ичида эмас, балки 1−2 кун давомида киритишга рухсат берган. Бу айрим нархларнинг барқарорлашишига сабаб бўлган.
Март бошида уй-жой қурилиши ва ипотека бозорини ривожлантиришга бағишланган йиғилишда бош вазирнинг биринчи ўринбосари Очилбой Раматов Президентдан корхоналарга цемент ва металлни ишлаб чиқарувчилардан тўғридан-тўғри сотиб олишга рухсат сўраган. У ўз таклифини 2021 йилда қурилиш ишлари ҳажми икки баробарга ошиши, қурилиш материалларига бўлган талаб эса нархнинг ошишига олиб келиши билан асослаган. Шавкат Мирзиёев таклифни яхшилаб ўрганиб чиқиш ва шаффоф тизим яратиш зарурлигини таъкидлаган.
ТН ВЭД 2523 коди — Портланд цементи, шлакли цемент, суперсулфат ва шунга ўхшаш гидравлик цементлар, бўялмаган ёки бўялган, тайёр ёки клинкер шаклидаги цементлар.
