Президент «Заргарлик саноатини янада ривожлантириш учун қулай шарт-шароитлар яратиш чора-тадбирлари тўғрисида"ги қарорни имзолади. «Газета.uz» ҳужжатнинг энг муҳим жиҳатларига эътибор қаратди.
Биринчидан, ишлаб чиқарувчиларга 2023 йил 1 мартга қадар заргарлик буюмларини ишлаб чиқарувчиларга қимматбаҳо металларни тўғридан-тўғри шартнома асосида ёки кечиктириб тўлаш шарти билан сотиш тартиби жорий қилинади.
Бунда қимматбаҳо металлар кейинчалик хом ашё кўринишида қайта сотиш ҳуқуқисиз тўғридан-тўғри шартнома асосида нархнинг 15 фоизлик аванс тўловини амалга оширган ҳолда 180 кунга кечиктириб тўлашга рухсат берилаяпти. Бунин учун «Навоий кон-металлургия комбинати» АЖ ва «Олмалиқ кон-металлургия комбинати» АЖ билан келишилган ҳолда «Ўзмиллийбанк» АЖ кафолатини тақдим этади. «Ўзмиллийбанк» банк кафолатини йиллик 2 фоизгача комиссия ундирган ҳолда тақдим этади.
Иккинчидан, 2021 йил 1 апрелдан бошлаб:
- заргарлик буюмларига асиллик даражаси тамғаси ва ишлаб чиқарувчининг шахсий тамғасини механик ёки лазер усуллари ёрдамида туширишга рухсат этилади.
- тамғалаш усули заргарлик буюмларини ишлаб чиқарувчилар томонидан мустақил белгиланади.
- юридик шахсларга ўзлари ишлаб чиқарган ўлчовли ёмбиларни жисмоний ва юридик шахсларга сотишга рухсат берилади. Бунда, нарх ишлаб чиқарувчи томонидан мустақил белгиланади (Лондон қимматбаҳо металлар биржасининг эрталабки фиксинг нархи ва Марказий банкнинг курсидан кам бўлмаган миқдорда).
- қимматбаҳо металлардан ва қимматбаҳо (ярим қимматбаҳо) тошлардан ясалган заргарлик буюмларини ички ва ташқи бозорларда электрон тижорат орқали сотишга рухсат берилади.
- мижозни, унинг вакилини ва бенефициар мулкдорни текшириш (улардан шахсини тасдиқловчи ҳужжат, давлат рўйхатидан ўтказилганлиги тўғрисидаги гувоҳнома, таъсис ҳужжатлари ва бошқа маълумотларни сўраб олиш) талаб этилмайди (нақд пулда ўзаро ҳисоб-китоб амалга оширилганда операциянинг умумий суммаси БҲМнинг 600 бараваридан ошмаган, хисоб-китоб жисмоний шахсларнинг пластик карталари орқали амалга оширилган тақдирда).
Бунда мулкдорнинг жиноий фаолиятдан олинган даромадларни легаллаштиришга ва терроризмни молиялаштиришга алоқадорлиги ҳақида асосланган шубҳалар мавжуд бўлган ҳолатларда операциянинг суммаси ва тўлов шаклидан қатъи назар, мижозни текшириш чоралари кўрилиши лозим.
Учинчидан, марварид, олмос ва қимматбаҳо тошларга импорт божхона божлари солинмайди.
Тўртинчидан, «Ўзмиллийбанк» 300 миллион сўмгача бўлган миқдорда 3 йил муддатга, 6 ойгача имтиёзли давр билан микрокредитлар ажратади.
Бешинчидан, 1 майга қадар қимматбаҳо металларни ишлаб чиқаришда ҳосил бўладиган парчаларни ва чиқиндиларни, қимматбаҳо металларнинг ўлчов пластиналари ва гранулалари, қимматбаҳо ва ярим қимматбаҳо тошлар, қимматбаҳо металлар ва қимматбаҳо тошлардан ясалган ярим тайёр маҳсулотларни реализация қилиш бўйича айланмани ҚҚСдан озод этиш бўйича ҳужжат лойиҳасини ишлаб чиқиш топшириғи берилган.
Бундан ташқари, 2023 йил 1 мартга қадар «Ўзбекзаргарсаноати» уюшмасига аъзо бўлган якка тартибдаги тадбиркорларга «Ҳунарманд» уюшмаси аъзолари учун берилган солиқ имтиёзлари татбиқ этилади.
Олтинчидан, Бандлик ва меҳнат муносабатлари вазирлиги ва «Ўзбекзаргарсаноати» уюшмаси бутун республика бўйича «Ишга марҳамат» мономарказлари ва касб-ҳунарга ўқитиш марказларида ҳамда «устоз-шогирд» услубида заргарлик соҳасида ўқув курсларини ташкил этади.
Бухоро, Самарқанд, Наманган ва Қўқон шаҳарларидаги йирик бозорларнинг заргарлик буюмларини чакана сотишга ихтисослашган савдо расталари ўрнида миллий бренд асосидаги заргарлик буюмларининг замонавий кўргазма-савдо дўконлари ва заргарлик савдо-ишлаб чиқариш марказлари ташкил этилади.
